नांदेड, 04 ऑगस्ट (हिं.स.)। शासकीय तंत्रनिकेतन, नांदेड येथे पर्यावरण संवर्धनाचा संदेश देणारा वृक्षारोपण कार्यक्रम संस्थेच्या प्रांगणात उत्साहपूर्ण वातावरणात संपन्न झाला. विद्यार्थ्यांमध्ये वृक्षारोपण व वृक्ष संगोपनाची जागरुकता निर्माण व्हावी, तसेच संस्थेच्या परिसरात एक निसर्गरम्य व पर्यावरण पूरक वातावरण तयार व्हावे या उद्देशाने प्रेरित होऊन वृक्षारोपणाच्या कार्यक्रमाचे आयोजन करण्यात आले होते.

या कार्यक्रमाचे उद्घाटन संस्थेचे प्राचार्य डॉ. नागेश जानराव यांच्या हस्ते झाले, त्यांनी विद्यार्थ्यांना पर्यावरणाचा समतोल राखण्यासाठी जास्तीत जास्त झाडे लावून त्याचे संगोपन करण्याचे महत्व स्पष्ट केले. पर्यावरण संरक्षण ही प्रत्येक नागरिकाची सामूहिक जबाबदारी असून हरित व समृध्द भारताच्या निर्मितीसाठी वृक्षारोपण व वृक्ष संगोपन करावे असे आवाहन त्यांनी केले. त्यांनी विद्यार्थ्यांच्या उत्स्फूर्त सहभागाचे कौतुक करुन अशा उपक्रमांमधून सामाजिक जबाबदारीची जाणीव अधिक दृढ होत असल्याचे नमूद केले. वृक्षारोपण समिती सचिव व्ही.बी. उश्केवार यांनी वृक्षसंवर्धनाचे महत्व स्पष्ट करुन प्रत्येक विद्यार्थ्यांनी किमान एक झाड लावून त्याचे संगोपन करण्याचे आवाहन केले.

---------------

हिंदुस्थान समाचार / Sangita Hanumant Rao Chitanis