रत्नागिरी, 4 ऑगस्ट (हिं.स.) । विठ्ठलराव जोशी हे एक सर्वोत्तम विद्यापीठ म्हणून नावारूपाला येईल असे प्रतिपादन पद्मविभूषण ज्येष्ठ शास्त्रज्ञ डॉ. अनिल काकोडकर यांनी केले.

ते आज सावर्डे (ता. चिपळूण) येथील श्री विठ्ठलराव जोशी अभिमत विद्यापीठाच्या उद्घाटन सोहळ्यात बोलत होते. ते पुढे म्हणाले, विद्यापीठ हे समाजाचे प्रतिबिंब असले पाहिजे आणि या आपल्या नवीन विद्यापीठामध्ये उच्च संशोधनाचा पाया अगोदरपासूनच घातला आहे. हे एक ग्रामीण भागातील वैशिष्ट्य म्हणावे लागेल. डेरवण – सावर्डे हा परिसर श्री विठ्ठलराव जोशी ट्रस्टच्या उत्तम कामगिरीमुळे एका सिलेजमध्ये परिवर्तित झालेला आहे. हे मी यापूर्वीच वेळोवेळी अधोरेखित केलेले आहे. त्यामुळे यापुढे देशाच्या या विद्यापीठाचे महत्त्वाचे योगदान राहील, याचा विश्वास वाटतो.

गेली पाच दशके हे काम सुरू आहे. रुग्णालय सेवा, नंतर शिक्षण, विविध खेळ हे सुरू केल्यानंतर आता आपण विद्यापीठाकडे वळतो आहोत. विद्यापीठांमधून बाहेर पडणारा विद्यार्थी यापुढे कोणत्याही अडचणीवर मात करून ती सोडवण्याची धमक असलेला हवा आणि त्या पद्धतीने या ठिकाणी शिक्षण मिळेल याची मला खात्री आहे. मी शिक्षण क्षेत्रातील नसलो तरी शिक्षण क्षेत्र अगदी जवळून बघितले आहे. अनेक कमिट्यांवर काम केले आहे. त्या वेळेला मी एक शिफारस अनेकदा केली की, अलीकडे परीक्षांचा हा घोळ आहे. त्यामध्ये कोणताही गोंधळ न होता बाहेर येणे शक्य आहे. विद्यापीठांनी आपले सगळे लक्ष संशोधन क्षेत्रात केंद्रित करावे आणि परीक्षा हा विषय निकष ठेवून एजन्सीकडे सुपूर्द करावा.

डॉ. काकोडकर म्हणाले, विद्यापीठांनी आपली ८० टक्के एनर्जी शैक्षणिक गुणवत्ता संशोधनाकडे खर्च करावी. या ठिकाणची रिसर्च लॅबोरेटरी सर्वोत्तम आहे.

या कार्यक्रमाला डेक्कन महाविद्यालयाचे कुलपती डॉ. भूषण पटवर्धन, सावित्रीबाई फुले पुणे विद्यापीठाचे माजी कुलगुरू नितीन करमळकर, डॉ. डी. वाय. पाटील विद्यापीठाचे कुलपती पी. डी. पाटील, माजी मंत्री शशिकांत सुतार, श्री विठ्ठलराव जोशी विद्यापीठाचे कुलगुरू डॉ. श्रीपाद बाणावली, नॅशनल सेंटर फॉर रेडिओ astrophysics NCRA-TIFR चे डॉ. यशवंत गुप्ता, डॉ. अरविंद नातू, कुलपती विकास वालावलकर, संस्थेचे प्रमुख विश्वस्त अशोक जोशी, रुग्णालयाच्या संचालिका डॉ सौ. सुवर्णा पाटील यांच्यासह मान्यवर उपस्थित होते.

या कार्यक्रमादरम्यान संस्थेचे प्रमुख विश्वस्त आणि कुलपती विकास वालावलकर यांच्या हस्ते सर्व मान्यवरांचा शाल पुष्पगुच्छ व स्मृतिचिन्ह देऊन सन्मान करण्यात आला.

---------------

हिंदुस्थान समाचार / रत्नागिरी