छ.संभाजीनगर , 06 ऑगस्ट (हिं.स.)।कॉकरोच जनता पार्टी (सीजेपी) पुढील महिन्यापासून देशभरात ‘काय म्हणते जनता?’ हे जनसंवाद अभियान सुरू करणार आहे. पक्षाचे संस्थापक अभिजीत दीपके यांनी सांगितले की, या अभियानाच्या माध्यमातून नागरिकांशी थेट संवाद साधून त्यांच्या समस्या आणि देशातील सध्याच्या परिस्थितीबाबतची त्यांची मते जाणून घेतली जाणार आहेत.

छत्रपती संभाजीनगर येथे पक्षाच्या कोअर टीमची बैठक संपल्यानंतर आयोजित पत्रकार परिषदेत दीपके म्हणाले की, या अभियानांतर्गत पक्ष देशभरातील नागरिकांशी प्रत्यक्ष संवाद साधणार आहे. ते म्हणाले, “या उपक्रमातून देशाच्या सध्याच्या परिस्थितीबाबत जनतेचे मत काय आहे आणि त्यांना कोणत्या अडचणींचा सामना करावा लागत आहे, हे जाणून घेण्याचा आमचा प्रयत्न असेल.” पक्षाच्या कोअर टीमची बैठक बुधवारी छत्रपती संभाजीनगर येथील दीपके यांच्या निवासस्थानी सुरू झाली होती. गुरुवारी तिचा समारोप झाला. या बैठकीत आगामी संघटनात्मक उपक्रम, जनसंपर्क मोहीम आणि पक्षाच्या विस्ताराच्या आराखड्यावरही सविस्तर चर्चा करण्यात आली.

अभिजीत दीपके यांनी सांगितले की, अलीकडेच जंतर-मंतर येथे झालेल्या आंदोलनातून रोजगाराचा प्रश्न केवळ विद्यार्थ्यांपुरता मर्यादित नसल्याचे स्पष्ट झाले आहे. या आंदोलनात मोठ्या संख्येने बेरोजगार युवक सहभागी झाले होते. त्यामुळे बेरोजगारीचा प्रश्न समाजातील सर्व स्तरांतील तरुणांवर परिणाम करत असल्याचे अधोरेखित झाले आहे. त्यांनी या आंदोलनाला युवकांच्या एकजुटीचे आणि लोकशाही पद्धतीने व्यक्त झालेल्या सामूहिक आवाजाचे प्रभावी उदाहरण असे संबोधले.

यावेळी त्यांनी बेरोजगारी ही देशासमोरील गंभीर समस्या असल्याचे सांगत, हा मुद्दा राष्ट्रीय पातळीवर पोहोचवण्यासाठी पक्ष काम करणार असल्याचे स्पष्ट केले. तसेच शिक्षण क्षेत्रात सुधारणा करण्यासाठीही प्रयत्न केले जातील, असे ते म्हणाले. “शालेय स्तरापासूनच शिक्षण महाग झाले आहे. शिक्षणाचा वापर नफा कमावण्याचे साधन म्हणून केला जात आहे. आम्हाला ही परिस्थिती बदलायची आहे,” असे त्यांनी नमूद केले.

दीपके म्हणाले की, सीजेपीचे उद्दिष्ट बेरोजगारीचा प्रश्न प्रत्येक राज्यात आणि प्रत्येक जिल्ह्यात पोहोचवणे आहे. यासाठी पक्ष विविध ठिकाणी बैठका, जनसंवाद कार्यक्रम, युवा संमेलन आणि जनजागृती मोहिमा आयोजित करणार आहे. रोजगाराच्या प्रश्नावर व्यापक लोकदबाव निर्माण झाल्याशिवाय प्रभावी तोडगा निघणे कठीण असल्याचे त्यांचे मत आहे.

अभिजीत दीपके यांनी युवकांना आवाहन केले की, रोजगार आणि आपल्या हक्कांच्या प्रश्नावर शांततापूर्ण व लोकशाही मार्गाने एकत्र यावे. देशाच्या विकासात युवकांची भूमिका सर्वात महत्त्वाची असून त्यांना रोजगाराच्या संधी उपलब्ध करून देणे ही सरकारची प्राथमिक जबाबदारी असल्याचे त्यांनी सांगितले. युवकांनी संघटित होऊन आपला आवाज बुलंद केल्यास बेरोजगारीचा प्रश्न राष्ट्रीय पातळीवर केंद्रस्थानी येईल आणि धोरणनिर्मितीतही त्याकडे गांभीर्याने पाहिले जाईल, असा विश्वास त्यांनी व्यक्त केला.

---------------

हिंदुस्थान समाचार / Priyanka Bansode