डेहराडून, ६ ऑगस्ट (हिं.स.). उत्तराखंडमध्ये संततधार मुसळधार पावसामुळे जनजीवन विस्कळीत झाले आहे. अनेक नद्यांची पाणी पातळी इशारा आणि धोक्याच्या पातळीवर पोहोचली आहे, तर भूस्खलन आणि ढिगाऱ्यांमुळे बद्रीनाथ, गंगोत्री आणि यमुनोत्रीसह अनेक राष्ट्रीय महामार्गांवरील वाहतूक विस्कळीत झाली आहे. हवामान विभागाने पुढील २४ तासांसाठी तीन जिल्ह्यांमध्ये मुसळधार ते अति मुसळधार पावसाचा इशारा दिला आहे. परिस्थिती लक्षात घेता, मुख्यमंत्री पुष्कर सिंह धामी यांनी सर्व आपत्ती व्यवस्थापन यंत्रणांना सतर्क राहण्याचे निर्देश दिले आहेत.
बुधवार रात्री उशिरापासून गुरुवार सकाळपर्यंत उत्तराखंडमध्ये मुसळधार पाऊस सुरू होता. राजधानी डेहराडूनसह बहुतेक जिल्ह्यांमध्ये काळे ढग दाटले होते आणि अनेक ठिकाणी मुसळधार पाऊस झाला. या संततधार पावसामुळे तापमान कमी होऊन हवामान थंड झाले. डोंगराळ प्रदेशात भूस्खलन आणि नद्या व ओढे ओसंडून वाहण्याच्या भीतीमुळे प्रशासन सतर्क झाले आहे. हवामान विभागाने लोकांना अनावश्यक प्रवास टाळण्याचा आणि नद्या व ओढ्यांपासून दूर राहण्याचा सल्ला दिला आहे. पाऊस सुरूच राहण्याची शक्यता आहे.
हवामान विभागाच्या अंदाजानुसार, पुढील २४ तासांत डेहराडून, बागेश्वर आणि पिथोरगड जिल्ह्यांतील काही ठिकाणी मुसळधार ते अति मुसळधार पाऊस, मेघगर्जना, विजांचा कडकडाट आणि सोसाट्याचा वारा अपेक्षित आहे. सततच्या पावसामुळे रुद्रप्रयागमध्ये अलकनंदा आणि मंदाकिनी नद्या धोक्याच्या पातळीच्या वर वाहत आहेत.
जिल्हा आपत्कालीन कार्य संचालन केंद्राच्या माहितीनुसार, गुरुवारी सकाळी ८ वाजता अलकनंदा नदीची पाणी पातळी ६२७.८० मीटर आणि मंदाकिनी नदीची ६२६.६० मीटर नोंदवली गेली, जी दोन्ही नद्यांसाठी निर्धारित केलेल्या धोक्याच्या पातळीपेक्षा जास्त आहे. प्रशासनाने नगरपालिकांमार्फत ध्वनीक्षेपकांद्वारे वारंवार सूचना जारी करून लोकांना नदीकिनारांपासून दूर राहण्याचे आवाहन केले आहे. जिल्ह्यात पाऊस सुरूच असून, उखीमठमध्ये ५३.३० मिमी आणि जाखोलीमध्ये ५९ मिमी पावसाची नोंद झाली आहे. कोणत्याही आपत्तीचा सामना करण्यासाठी सर्व विभागांना पूर्णपणे सतर्क राहण्याचे निर्देश जिल्हा प्रशासनाने दिले आहेत.
---------------
हिंदुस्थान समाचार / वृषाली देशपांडे
