युजीन (ओरेगॉन), 07 ऑगस्ट (हिं.स.)। जागतिक ज्युनियर ऍथलेटिक्स अजिंक्यपद स्पर्धेच्या दुसऱ्या दिवशी गुरुवारी भारताच्या मोहम्मद अशफाकने शानदार कामगिरी करत पुरुष 400 मीटर स्पर्धेत नवा अंडर-20 राष्ट्रीय विक्रम प्रस्थापित केला आणि अंतिम फेरीत प्रवेश मिळवला. तसेच, बसंतने पुरुष हाय जंपच्या अंतिम फेरीसाठी पात्रता मिळवत भारताच्या आशा कायम ठेवल्या.

19 वर्षीय अशफाकने हीट-5 मध्ये 45.81 सेकंदांची वेळ नोंदवत दुसरे स्थान मिळवले आणि उपांत्य फेरीत प्रवेश केला. यावेळी त्याने एप्रिलमध्ये बेंगळुरू येथे झालेल्या अंडर-20 फेडरेशन कपमध्ये स्वतःच्या नावावर असलेला 46.05 सेकंदांचा राष्ट्रीय विक्रम मोडला. त्यानंतर उपांत्य फेरीतील तिसऱ्या हीटमध्ये अशफाकने 46.00 सेकंदांची वेळ नोंदवत तिसरे स्थान मिळवले आणि अंतिम फेरीत प्रवेश केला. अमेरिकेचा क्विन्सी विल्सन (45.02 सेकंद) आणि दक्षिण आफ्रिकेचा किर्न रोमिन (45.87 सेकंद) हे त्याच्या पुढे राहिले. तर भारताचा पियूष राज हीट-6 मध्ये 47.78 सेकंदांच्या वेळेसह पाचव्या स्थानावर राहिला आणि अंतिम फेरीत प्रवेश करू शकला नाही.

पुरुष हाय जंपमध्ये बसंतने 2.14 मीटरची उडी मारत गट-अ मध्ये पाचवे स्थान मिळवले आणि अंतिम फेरीसाठी पात्रता मिळवली. तर के. अंब्रीश गट-ब मध्ये 2.05 मीटरच्या सर्वोत्तम उडीसह स्पर्धेबाहेर झाला. दोन्ही गटांतील एकाही खेळाडूला 2.21 मीटरचा स्वयंचलित पात्रता निकष पार करता आला नाही.

महिला डिस्कस थ्रोच्या अंतिम फेरीत अमनत कंबोजने 53.24 मीटरची वैयक्तिक सर्वोत्तम कामगिरी करत सहावे स्थान मिळवले. या स्पर्धेचे सुवर्णपदक चीनच्या सू यिक्सिनने 61.06 मीटरच्या अंडर-20 विश्वातील सर्वोत्तम फेकीसह जिंकले. महिला शॉटपुटमध्ये अंशुला अंतिम फेरीत प्रवेश मिळवता आला नाही. तिने पात्रता फेरीत 15.24 मीटरचा सर्वोत्तम प्रयत्न केला आणि गट-अ मध्ये नववे तसेच एकूण 14वे स्थान मिळवले. अंतिम फेरीसाठी निर्धारित कटऑफपेक्षा ती 21 सेंटीमीटरने मागे राहिली.

महिला 400 मीटर अडथळा शर्यतीत तनु चौधरीने 1:00.03 मिनिटांची वेळ नोंदवत आपल्या हीटमध्ये पाचवे स्थान मिळवले आणि अंतिम फेरीत प्रवेश करू शकली नाही. तर पुरुष 400 मीटर अडथळा शर्यतीत अमित कुमार 54.01 सेकंदांच्या वेळेसह आपल्या हीटमध्ये अखेरच्या स्थानावर राहिला. पुरुष ट्रिपल जंप पात्रता फेरीत धनुष राज (14.71 मीटर) आणि पी. रॉयशन (15.20 मीटर) हे अंतिम फेरीसाठी पात्र ठरू शकले नाहीत.

---------------

हिंदुस्थान समाचार / Suraj Chaugule