नवी दिल्ली, 06 ऑगस्ट (हिं.स.)भारतीय महिला संघाच्या या वर्षाच्या अखेरीस होणाऱ्या दक्षिण आफ्रिका दौऱ्याच्या वेळापत्रकात बदल करण्यात आला असून, सामन्यांची संख्या वाढवण्यात आली आहे. या दौऱ्यात आता तीन एकदिवसीय आणि एका कसोटी सामन्यासोबतच तीन टी-२० सामन्यांचाही समावेश असेल. मूळतः ६ ते २३ डिसेंबर दरम्यान होणाऱ्या या दौऱ्यात एक सराव सामना, तीन एकदिवसीय आणि एका कसोटी सामन्याचा समावेश होता. आता वेळापत्रकात बदल करण्यात आला आहे. या दौऱ्याची सुरुवात ९ ते १२ डिसेंबर दरम्यान एका कसोटी सामन्याने होईल, त्यानंतर १६ ते ३० डिसेंबर दरम्यान तीन एकदिवसीय आणि तीन टी-२० सामने खेळले जातील.

गेबेर्हा येथील कसोटी सामना या बदलामुळे दक्षिण आफ्रिकेच्या पुरुष संघाच्या इंग्लंडविरुद्धच्या कसोटी सामन्याशी जुळणार नाही. तीन एकदिवसीय सामने पार्ल, केप टाऊन आणि ब्लोमफॉन्टेन येथे खेळले जातील. हे सामने महिला चॅम्पियनशिपचा भाग आहेत, ज्यातून २०२९ च्या एकदिवसीय विश्वचषकासाठी पात्रता निश्चित होईल. यामुळे बोलँड पार्कला एक असा सामना खेळायला मिळेल जो पूर्वी खेळला गेला नव्हता. टी२० आंतरराष्ट्रीय सामने २६, २९ आणि ३० डिसेंबर रोजी बेनोनी आणि पोटस्ट्रम येथे खेळले जातील.

भारतीय संघ यावर्षी मार्च-एप्रिलमध्ये टी२० आंतरराष्ट्रीय मालिकेसाठी दक्षिण आफ्रिकेच्या दौऱ्यावर गेला होता. आणि हरमनप्रीतच्या संघाला ४-१ ने पराभव पत्करावा लागला. त्यानंतर इंग्लंडमध्ये झालेल्या टी२० विश्वचषक स्पर्धेत हे दोन्ही संघ आमनेसामने आले होते. या सामन्यात दक्षिण आफ्रिकेने भारताला पराभूत करून उपांत्य फेरी गाठण्याच्या त्यांच्या आशांना मोठा धक्का दिला होता.

सीएसएच्या सीईओ फोलेत्सी मोसेकी यांनी एक निवेदन जारी करून सांगितले की, भारताच्या दक्षिण आफ्रिका दौऱ्याचे सुधारित वेळापत्रक निश्चित करताना त्यांना आनंद होत आहे. यामध्ये टी२० आंतरराष्ट्रीय मालिकेचा समावेश आहे, ज्यामुळे त्यांच्या संघाला पुढील वर्षीच्या सुरुवातीला श्रीलंकेत होणाऱ्या पहिल्या आयसीसी महिला चॅम्पियन्स ट्रॉफीसाठी सर्वोत्तम तयारी करता येईल.

---------------

हिंदुस्थान समाचार / वृषाली देशपांडे