जळगाव, 10 सप्टेंबर (हिं.स.) : सोने-चांदी खरेदी करणाऱ्या ग्राहकांसाठी महत्त्वाची बातमी समोर आली असून गणेशोत्सवाला अवघे काही दिवस शिल्लक असतानाच आज मौल्यवान धातूंच्या दरात पुन्हा एकदा मोठी वाढ झाली आहे. आज गुरुवारी सकाळी बाजार उघडताच सोन्याच्या दरात तब्बल १ हजार २०० रुपयांची वाढ झाली असून, चांदीही किलोमागे ५ हजार रुपयांनी महागली आहे. त्यामुळे सणासुदीच्या काळात सोने-चांदी खरेदी करणाऱ्या ग्राहकांना आता अधिक पैसे मोजावे लागणार आहेत

आजच्या या दरवाढीनंतर जळगावच्या सराफ बाजारात २४ कॅरेट सोन्याचा १० ग्रॅमचा भाव १ लाख ५५ हजार ५१० रुपयांवर पोहोचला आहे. एका दिवसात सोन्याच्या दरात १ हजार २०० रुपयांची वाढ झाल्याने ग्राहकांच्या खरेदीच्या बजेटवर त्याचा थेट परिणाम होणार आहे. लग्नसराई, गणेशोत्सव किंवा गुंतवणुकीसाठी सोने खरेदी करणाऱ्यांसाठी ही दरवाढ महत्त्वाची ठरत आहे.सोन्याबरोबरच चांदीच्या दरातही मोठी वाढ नोंदवण्यात आली आहे. जळगावच्या सराफ बाजारात १ किलो चांदीच्या दरात तब्बल ५ हजार रुपयांची वाढ झाली आहे. त्यामुळे चांदीच्या वाढत्या दरामुळेही ग्राहक आणि गुंतवणूकदारांच्या खर्चाचे गणित बदलले आहे

आंतरराष्ट्रीय बाजारातील सोन्या-चांदीच्या किमतीतील चढ-उताराचा थेट परिणाम देशांतर्गत सराफ बाजारावर होत असतो. जागतिक पातळीवर आर्थिक अनिश्चितता वाढणे, गुंतवणूकदारांकडून सुरक्षित गुंतवणुकीकडे वाढलेला कल, डॉलरच्या मूल्यामध्ये होणारे बदल आणि व्याजदरांबाबतच्या अपेक्षा यामुळे सोन्याच्या दरात तेजी येताना दिसते. यासोबतच गणेशोत्सव आणि आगामी सणासुदीच्या काळात सोने-चांदीची मागणी वाढण्याची शक्यता असल्याने बाजारातील तेजीला काही प्रमाणात मागणीचाही आधार मिळत आहे. चांदीच्या बाबतीत गुंतवणुकीसोबतच औद्योगिक क्षेत्रातील मागणीही तिच्या किमतीवर परिणाम करणारा महत्त्वाचा घटक मानला जातो

---------------

हिंदुस्थान समाचार / मनोहर कांडेकर