* प्रति समभाग ₹ ७९ ते ₹ ८४ किंमतपट्टा निश्चित

मुंबई, 10 सप्टेंबर (हिं.स.) - हिरो मोटर्स लिमिटेडने (Hero Motors Limited) आपल्या पहिल्या सार्वजनिक भागविक्रीसाठी (आयपीओ) प्रति समभाग ₹१०/- दर्शनी मूल्य असलेल्या समभागांसाठी ₹ ७९ ते ₹ ८४ असा किंमतपट्टा (प्राइस बँड) निश्चित केला आहे.

कंपनीची ही सार्वजनिक भागविक्री (आयपीओ किंवा ऑफर) अर्ज भरण्यासाठी बुधवार, १६ सप्टेंबर २०२६ रोजी उघडेल आणि शुक्रवार, १८ सप्टेंबर २०२६ रोजी बंद होईल. गुंतवणूकदार किमान १७८ समभागांसाठी (Equity Shares) आणि त्यानंतर १७८ च्या पटीत बोली लावू शकतात. हा आयपीओ ₹ ६०० कोटींपर्यंतच्या नवीन समभाग विक्रीचा (Fresh Issue) आणि प्रवर्तक ओ पी मुंजाल होल्डिंग्स आणि हिरो सायकल्स लिमिटेड यांच्याद्वारे ₹ ४०० कोटींपर्यंतच्या समभागांच्या विक्रीचा (Offer-for-Sale) एकत्रित प्रस्ताव आहे.

नवीन समभाग विक्रीतून मिळणाऱ्या ₹ १९० कोटींच्या रक्कमेचा वापर कंपनीने घेतलेल्या काही थकीत कर्जाची पूर्ण किंवा अंशतः परतफेड/पूर्वपेमेंट/मुदतपूर्तीसाठी केला जाईल; ₹ २०० कोटींचा वापर उत्तर प्रदेशातील गौतमबुद्ध नगर येथील प्रकल्पाची क्षमता वाढवण्यासाठी आवश्यक उपकरणांची खरेदी करून भांडवली खर्चासाठी (Capital Expenditure) केला जाईल; उर्वरित निधी अनिश्चित अधिग्रहणांद्वारे अजैविक वाढ (Inorganic Growth), इतर धोरणात्मक उपक्रम आणि सामान्य कॉर्पोरेट उद्दिष्टांसाठी वापरला जाईल.

अमेरिका, युरोप, भारत आणि आसियान (ASEAN) क्षेत्रातील ऑटोमोटिव्ह मूळ उपकरण उत्पादकांना (OEMs) अत्याधुनिक पॉवरट्रेन सोल्यूशन्स डिझाइन, विकसित, उत्पादन आणि पुरवठा करणाऱ्या भारतातील आघाडीच्या ऑटोमोटिव्ह तंत्रज्ञान कंपन्यांपैकी ही एक कंपनी आहे (स्रोत - CRISIL अहवाल).

ही कंपनी एक पूर्णपणे एकात्मिक पॉवरट्रेन सिस्टम प्रदाता आहे, जी इलेक्ट्रिक तसेच नॉन-इलेक्ट्रिक दोन्ही प्रकारच्या पॉवरट्रेनसाठी सिस्टम-लेव्हल आणि कॉम्पोनंट-लेव्हल सोल्यूशन्स डिझाइन, प्रोटोटायपिंग, व्हॅलिडेटिंग, डेव्हलपिंग आणि वितरीत करण्याच्या सेवांसह सर्वसमावेशक उपाय प्रदान करते.

कंपनीची उत्पादने दुचाकी, परफॉर्मन्स ऑटोमोटिव्ह, ई-बाईक्स, ऑफ-रोड वाहने, इलेक्ट्रिक आणि हायब्रिड कार, अवजड वाहने आणि इलेक्ट्रिक व्हर्टिकल टेक-ऑफ अँड लँडिंग (eVTOL) श्रेणींमध्ये वापरली जातात. कंपनी BMW AG (BMW), Ducati Motor Holding S.P.A. (Ducati), Enviolo International Inc (enviolo), Formula Motorsport Ltd (Formula Motorsport), HUMMINGBIRDEV Inc. (Hummingbird EV), HWA AG (HWA) यांसारख्या जागतिक ग्राहकांच्या आणि इतर प्रमुख जागतिक इलेक्ट्रिक सायकल (e-bike) उत्पादकांच्या तसेच एरोस्पेससारख्या इतर मोबिलिटी ॲप्लिकेशन्सच्या गरजा पूर्ण करते.

कमी वजनाचे घटक राखून उच्च टॉर्क गरजा हाताळण्यास सक्षम असलेल्या उच्च-परफॉर्मन्स ट्रान्समिशन सिस्टमची आवश्यकता असणाऱ्या प्रीमियम ICE आणि परफॉर्मन्स ICE सेगमेंटच्या गरजा पूर्ण करणाऱ्या मोजक्या कंपन्यांपैकी ही एक आहे (स्रोत - CRISIL अहवाल). ही कंपनी तंत्रज्ञान आणि नवोपक्रमावर आधारित असून, तिने आपल्या इन-हाउस डिझाइन आणि अभियांत्रिकी क्षमतेमध्ये भरीव गुंतवणूक केली आहे, तसेच आपले कौशल्य आणि उत्पादन व सेवांचा विस्तार करण्यासाठी जागतिक कंपन्यांसोबत तंत्रज्ञान भागीदारी केली आहे.

कंटिन्युअसली व्हेरिअबल ट्रान्समिशन (CVT), इलेक्ट्रिक व्हेईकल (“EV”) ट्रान्समिशन, इलेक्ट्रिक मोटर्स, इंटिग्रेटेड ड्राईव्ह युनिट्स आणि गिअर सेट्सच्या विकास आणि उत्पादनातील नेतृत्वासाठी ही कंपनी ओळखली जाते.

आयसीआयसीआय सिक्युरिटीज लिमिटेड, डॅम कॅपिटल ॲडव्हायझर्स लिमिटेड आणि जेएम फायनान्शियल लिमिटेड हे या इश्यूचे बुक-रनिंग लीड मॅनेजर आहेत आणि केफिन टेक्नॉलॉजीज लिमिटेड ही या ऑफरची रजिस्ट्रार आहे.

ही ऑफर सेबी आयसीडीआर (SEBI ICDR) नियमांचे पालन करून बुक-बिल्डिंग प्रक्रियेद्वारे केली जात आहे, ज्यामध्ये निव्वळ ऑफरच्या ५०% पेक्षा जास्त हिस्सा पात्र संस्थात्मक खरेदीदारांसाठी (QIBs) असणार नाही, किमान १५% बिगर-संस्थात्मक बोलीदारांसाठी (NIIs) आणि किमान ३५% हिस्सा किरकोळ वैयक्तिक बोलीदारांसाठी (RIIs) वाटपासाठी उपलब्ध असेल.

---------------

हिंदुस्थान समाचार / सुधांशू जोशी