* सिद्धिविनायक आणि लालबागचा राजा येथे दर्शन घेऊन पूजा करणार – मुंबई भाजप अध्यक्ष व आमदार अमीत साटम

* मुख्यमंत्री आणि दोन्ही उपमुख्यमंत्र्यांच्या निवासस्थानी बाप्पाचे आशीर्वाद घेणार

मुंबई, 15 सप्टेंबर (हिं.स.) : भाजपचे राष्ट्रीय अध्यक्ष नितीन नबीन बुधवारी मुंबई दौऱ्यावर येणार असून, ते सिद्धिविनायक मंदिर आणि लालबागचा राजा येथे दर्शन घेऊन गणरायाची पूजा करणार आहेत तसेच मुख्यमंत्री देवेंद्र फडणवीस तसेच दोन्ही उपमुख्यमंत्री एकनाथ शिंदे आणि सुनेत्रा पवार यांच्या निवासस्थानी बाप्पाचे आशीर्वाद घेणार आहेत, अशी माहिती मुंबई भाजपचे अध्यक्ष आणि आमदार अमीत साटम यांनी दिली.

साटम यांनी सांगितले की, नितीन नबीन सकाळी सुमारे १०.२० वाजता छत्रपती शिवाजी महाराज आंतरराष्ट्रीय विमानतळाच्या टर्मिनल-२ येथे मुंबईत दाखल होतील. यावेळी भाजपचे पदाधिकारी, नेते आणि कार्यकर्त्यांकडून त्यांचे भव्य स्वागत करण्यात येणार आहे.

मुंबईत आगमन झाल्यानंतर नितीन नबीन सर्वप्रथम सिद्धिविनायक मंदिरात जाऊन दर्शन घेतील. त्यानंतर ते लालबागचा राजा येथे दर्शनासाठी जातील. त्यानंतर ते मुख्यमंत्री देवेंद्र फडणवीस तसेच उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या निवासस्थानी जाऊन बाप्पाचे आशीर्वाद घेणार आहेत, असे आमदार अमीत साटम यांनी सांगितले.

त्यानंतर नितीन नबीन मुख्यमंत्री देवेंद्र फडणवीस यांचे अधिकृत निवासस्थान असलेल्या ‘वर्षा’ येथे दुपारचे भोजन घेणार असल्याचे साटम यांनी सांगितले.

भोजनानंतर भाजपचे राष्ट्रीय अध्यक्ष वांद्रे पूर्व येथील वांद्रे रेक्लमेशन परिसरातील गणपती मंडळाला भेट देतील. त्यानंतर ते छत्रपती शिवाजी महाराज आंतरराष्ट्रीय विमानतळावरून पुण्याकडे रवाना होतील, अशी माहिती साटम यांनी दिली.

---------------

हिंदुस्थान समाचार / सुधांशू जोशी