नवी दिल्ली , 23 सप्टेंबर (हिं.स.)।तुर्कियेचे राष्ट्राध्यक्ष रेसेप तय्यिप एर्दोगान यांनी पुन्हा एकदा संयुक्त राष्ट्र महासभेच्या (यूएनजीए) व्यासपीठावरून काश्मीरचा मुद्दा उपस्थित केला आहे. एर्दोगान यांनी यूएनजीएच्या व्यासपीठावरून पुन्हा एकदा काश्मीरचा मुद्दा उपस्थित करत दक्षिण आशियातील सर्व वाद, ज्यामध्ये काश्मीरचा प्रश्नही समाविष्ट आहे, संयुक्त राष्ट्रांच्या सनदेच्या चौकटीत चर्चेच्या माध्यमातून सोडवले जावेत, असे म्हटले आहे.

अमेरिकेतील न्यूयॉर्क येथे आयोजित संयुक्त राष्ट्र महासभेच्या बैठकीत मंगळवारी (२२ सप्टेंबर २०२६) आपल्या भाषणादरम्यान तुर्कियेचे राष्ट्राध्यक्ष एर्दोगान म्हणाले, “दक्षिण आशियामध्ये काश्मीरच्या प्रश्नासह इतर सर्व वाद संयुक्त राष्ट्रांच्या सनदेसह संबंधित ठरावांच्या चौकटीत चर्चा आणि संवादाच्या माध्यमातून सोडवणे अत्यंत आवश्यक आहे.”

गेल्या अनेक वर्षांपासून तुर्कियेचे राष्ट्राध्यक्ष संयुक्त राष्ट्र महासभेच्या व्यासपीठावरून वारंवार काश्मीरचा मुद्दा उपस्थित करत आहेत. मात्र, भारताने प्रत्येक वेळी काश्मीरबाबत आपल्या सार्वभौमत्वाची भूमिका स्पष्ट केली आहे. भारताने एर्दोगान यांच्या वक्तव्यांवर अनेकदा उघडपणे आक्षेप घेत त्यांची टीका केली आहे. तसेच, जम्मू-काश्मीर हा भारताचा अविभाज्य भाग असल्याचे भारताने वारंवार स्पष्ट केले आहे.

एर्दोगान यांच्या वक्तव्यांनंतर भारताने तुर्कियेला इतर देशांच्या सार्वभौमत्वाचा आदर करण्याचा सल्ला दिला होता. तसेच, भारताच्या अंतर्गत बाबींमध्ये हस्तक्षेप करणे आणि त्यावर वक्तव्ये करणे टाळावे, असेही स्पष्ट करण्यात आले होते. मात्र, एर्दोगान यांनी भारताच्या भूमिकेविरोधात काश्मीरचा मुद्दा उपस्थित करणे सुरूच ठेवले असून, पुन्हा एकदा त्यांनी यूएनजीएच्या व्यासपीठाचा वापर करून काश्मीरचा मुद्दा उपस्थित केला आहे.

एर्दोगान यांच्या वक्तव्यांवर भारताकडून यापूर्वी तीव्र प्रतिक्रिया व्यक्त करण्यात आल्या आहेत. पंतप्रधान नरेंद्र मोदी यांनी तुर्कियेचा प्रस्तावित दौराही रद्द केला होता. त्याचबरोबर भारताने अंकारासोबतचे संरक्षण सहकार्य मर्यादित करण्याच्या दिशेनेही महत्त्वाची पावले उचलली होती.

---------------

हिंदुस्थान समाचार / Priyanka Bansode