नवी दिल्ली, 24 सप्टेंबर (हि.स.)। कमकुवत जागतिक संकेतांचा परिणाम आज देशांतर्गत शेअर बाजारावर स्पष्टपणे दिसून येत आहे. सुरुवातीच्या व्यवहारात बाजारावर सातत्याने दबाव कायम राहिला. आजच्या व्यवहाराची सुरुवातही घसरणीसह झाली. बाजार उघडल्यानंतर काही वेळाने खरेदीदारांनी जोरदार खरेदी करत सेन्सेक्स आणि निफ्टी या दोन्ही प्रमुख निर्देशांकांना आधार देण्याचा प्रयत्न केला. मात्र, हा प्रयत्न फार काळ टिकला नाही आणि त्यानंतर बाजारात पुन्हा विक्रीचा दबाव निर्माण झाला. त्यामुळे दोन्ही निर्देशांकांची घसरण आणखी वाढली.

सतत सुरू असलेल्या खरेदी-विक्रीमुळे सुरुवातीच्या एका तासाच्या व्यवहारानंतर सकाळी 10.15 वाजता सेन्सेक्स 690.73 अंक म्हणजेच 0.92 टक्क्यांनी घसरून 74,137.52 अंकांवर, तर निफ्टी 229.70 अंक म्हणजेच 0.98 टक्क्यांच्या घसरणीसह 23,217.10 अंकांवर व्यवहार करत होता.

बीएसईचा सेन्सेक्स आज 555.85 अंक म्हणजेच 0.74 टक्क्यांच्या घसरणीसह 74,272.40 अंकांवर उघडला. बाजार सुरू झाल्यानंतर काही वेळाने खरेदीदारांनी जोरदार लिवाली केल्याने सेन्सेक्स सुरुवातीच्या पातळीपेक्षा सुमारे 90 अंकांनी वाढून 74,362.29 अंकांवर पोहोचला. मात्र, खरेदीचा हा कल फार काळ टिकला नाही. त्यानंतर विक्रीचा दबाव वाढल्याने सेन्सेक्स 700 अंकांहून अधिक घसरून 74,111.23 अंकांच्या नीचांकी पातळीवर आला.

दुसरीकडे, एनएसईचा निफ्टी आज 225 अंक म्हणजेच 0.96 टक्क्यांनी घसरून 23,221.80 अंकांवर उघडला. बाजार सुरू झाल्यानंतर काही वेळाने खरेदी वाढल्याने निफ्टी सुरुवातीच्या पातळीपेक्षा 60.15 अंकांनी वाढून 23,281.95 अंकांवर पोहोचला. त्यानंतर विक्रीचा दबाव निर्माण झाल्याने निर्देशांकाची घसरण वाढली.

सततच्या विक्रीमुळे सकाळी सुमारे 10 वाजता निफ्टी 241.35 अंकांनी घसरून 23,205.45 अंकांवर आला. त्यानंतर पुन्हा एकदा खरेदीदारांनी बाजाराला आधार देण्याचा प्रयत्न केला. त्यामुळे निर्देशांकाच्या हालचालीत काहीशी सुधारणा दिसून आली. मात्र, खरेदी-विक्रीच्या सततच्या दबावामुळे सकाळी 10.15 वाजता निफ्टी 229.70 अंक म्हणजेच 0.98 टक्क्यांनी घसरून 23,217.10 अंकांवर व्यवहार करत होता.

आतापर्यंतच्या व्यवहारात शेअर बाजारातील 2,908 समभागांमध्ये सक्रिय व्यवहार सुरू होते. त्यापैकी 826 समभाग वाढीसह हिरव्या निशाणावर, तर 2,082 समभाग घसरणीसह लाल निशाणावर व्यवहार करत होते.

सेन्सेक्समध्ये समाविष्ट 30 समभागांपैकी केवळ 5 समभाग हिरव्या निशाणावर, तर 25 समभाग लाल निशाणावर व्यवहार करत होते. त्याचप्रमाणे निफ्टीतील 50 समभागांपैकी केवळ 3 समभाग वाढीसह, तर 47 समभाग घसरणीसह व्यवहार करताना दिसून आले.

सुरुवातीच्या एका तासाच्या व्यवहारानंतर प्रमुख कंपन्यांमध्ये एसबीआय लाइफ इन्शुरन्स, टेक महिंद्रा, आयसीआयसीआय बँक, एटरनल आणि टायटन कंपनी यांच्या समभागांमध्ये 0.06 टक्के ते 0.97 टक्क्यांपर्यंतची किरकोळ वाढ नोंदवली जात होती.

याउलट एचडीएफसी लाइफ, बजाज फायनान्स, ऍक्सिस बँक, बजाज फिनसर्व्ह आणि हिंदाल्को इंडस्ट्रीज यांच्या समभागांमध्ये 1.92 टक्के ते 6.29 टक्क्यांपर्यंतची घसरण दिसून आली.

यापूर्वी, मागील व्यवहाराच्या दिवशी म्हणजेच बुधवारी सेन्सेक्स 299.17 अंक म्हणजेच 0.40 टक्क्यांच्या वाढीसह 74,828.25 अंकांवर बंद झाला होता. त्याचवेळी निफ्टी 117.80 अंक म्हणजेच 0.51 टक्क्यांच्या वाढीसह 23,446.80 अंकांवर बंद झाला होता.--------------------------

हिंदुस्थान समाचार / मनीष कुलकर्णी