अपघातग्रस्त विमानात प्रवाशांसह एकूण 72 जण होते

अस्थाना, 25 डिसेंबर (हिं.स.) : कझाकस्तानमध्ये आज, बुधवारी अझरबैजानचे प्रवासी विमान कोसळले. बाकूहून रशियाला जाणाऱ्या या विमानात 67 प्रवासी 5 क्रू मेंबर्स असे एकूण 72 जण होते. वातावरणातील धुक्यामुळे अझरबैजान एअरलाइन्सच्या या विमानाचा मार्ग बदलण्यात आला. होता. कझाकस्तानमधील अकुत विमानतळाजवळ विमान कोसळले. या अपघातात सुमारे 50 जणांचा मृत्यू झाल्याची माहिती स्थानिक प्रशासनाने दिली.

या विमान अपघाताचा एक व्हिडिओ समोर आला आहे. कझाकिस्तानच्या अकुत विमानतळाजवळ लँडिंग करताना विमानाचा तोल सुटला आणि जमिनीवर आदळताच आग लागली हे त्या व्हिडीओत स्पष्टपणे दिसत आहे. अपघातग्रस्त विमानातील अनेक प्रवाशांचा मृत्यू झाल्याची भीती व्यक्त केली जात असून 25 जणांना सुखरूप बाहेर काढल्याची माहिती पुढे आलीय. मात्र, जखमींच्या संदर्भातील तपशील अद्याप पुढे येऊ शकलेला नाही. धुक्यामुळे हा विमान अपघात झाल्याचे प्राथमिक तपासात स्पष्ट झाले आहे.

-------------------------------------

हिंदुस्थान समाचार / मनीष कुलकर्णी