महाकुंभाला येणाऱ्या भाविकांसाठी रेल्वेकडून व्यवस्था

प्रयागराज, 03 जानेवारी (हिं.स.) : उत्तरप्रदेशच्या प्रयागराज येथे आयोजित कुंभमेळ्याच्या पार्श्वभूमीवर येथे भाविकांची अलोट गर्दी अपेक्षित आहे. या भाविकांना आरोग्याची सुविधा देण्यासाठी रेल्वेने कंबर कसली आहे. रेल्वेकडून भाविकांसाठी विशेष वैद्यकीय सेवा आणि चोवीसतास नियंत्रण कक्षांची व्यवस्था उपलब्ध करून देण्यात आलीय.

उत्तर प्रदेशात होणाऱ्या प्रयागराज महाकुंभाची अंतिम तयारी जोरात सुरू आहे. या महाकुंभात सहभागी होण्यासाठी परदेशातूनच नव्हे तर देशातील विविध राज्यांतूनही भाविक प्रयागराजला पोहोचणार आहेत. अशा परिस्थितीत लोकांच्या आरोग्याचा विचार करून भारतीय रेल्वेने महत्त्वाचे पाऊल उचलले आहे. प्रयागराजच्या रेल्वे स्थानकांवर यात्रेकरूंच्या आरोग्य सुरक्षेसाठी रेल्वेने विशेष व्यवस्था केली आहे. विशेष वैद्यकीय सुविधांसाठी चोवीस तास निरीक्षण कक्षांची व्यवस्था करण्यात आली आहे जेणेकरून कोणत्याही आपत्कालीन परिस्थितीत त्वरित आणि प्रभावी वैद्यकीय सेवा प्रदान करता येईल. याबाबत रेल्वे अधिकाऱ्यांनी सांगितले की, प्रयागराज महाकुंभ दरम्यान रेल्वे स्थानकांवर 24 तास वैद्यकीय सेवा उपलब्ध असेल. जेव्हा कोणत्याही प्रवाशाला वैद्यकीय मदतीची आवश्यकता असेल तेव्हा त्यांना त्वरित प्रथमोपचार प्रदान केले जातील. यासोबतच रेल्वे रुग्णालये आणि आरोग्य केंद्रांशी समन्वय ठेवेल जेणेकरून गरज पडल्यास कोणत्याही रुग्णाला तातडीने रेफर करता येईल.

रेल्वे अधिकाऱ्यांनी सांगितले की, प्रयागराज जंक्शन, प्रयाग जंक्शन, सुभेदारगंज, नैनी जंक्शन आणि प्रयागराज छिवकी स्टेशनवर निरीक्षण कक्ष स्थापन करण्यात आले आहेत. या खोल्यांमध्ये डॉक्टर आणि इतर वैद्यकीय कर्मचारी नेहमी उपस्थित राहतील. याठिकाणी सर्व आवश्यक वैद्यकीय उपकरणे असतील, जेणेकरून प्रवाशांना त्वरित उपचार मिळू शकतील. यामध्ये 15 स्टाफ नर्स, 12 फार्मासिस्ट, 12 हॉस्पिटल अटेंडंट आणि 15 हाऊसकीपिंग असिस्टंट तैनात करण्यात येणार आहेत. सर्व शिफ्टमध्ये वैद्यकीय सेवा सुरळीत चालाव्यात यासाठी हे कर्मचारी तैनात करण्यात आले आहेत. प्रत्येक शिफ्टची वेळ 8 तासांची असेल असे त्यांनी सांगितले.

--------------------------------

हिंदुस्थान समाचार / मनीष कुलकर्णी