मुंबई , 5 जानेवारी (हिं.स.)। बिग बॉस मराठी गाजवणारी अभिनेत्री मीरा जगन्नाथ आता हेमा बनून प्रेक्षकांच्या काळजाचा ठोका चुकवायला सज्ज झाली आहे.मीराचा बोल्ड अँड ब्युटीफुल अंदाज आपल्याला आगामी 'इलू इलू' या मराठी चित्रपटात दिसणार आहे. या चित्रपटाचं दिलखेचक पोस्टर सध्या सोशल मीडियावर चर्चेत आहे. 'इलू इलू' हा चित्रपट येत्या ३१ जानेवारीला प्रदर्शित होणार आहे.

चित्रपटातील भूमिकेबद्दल बोलताना मीरा म्हणाली की, ‘आजवरच्या माझ्या भूमिकांपेक्षा वेगळी भूमिका मला 'इलू इलू'च्या निमित्ताने करायला मिळाली याचा आनंद असून हेमा देसाई ही व्यक्तिरेखा मी स्वतः खूप एन्जॉय केली. पूर्णपणे नवं असं काहीतरी करून दाखवण्याचा माझा प्रयत्न होता. हेमा देसाई या भूमिकेच्या निमित्ताने मला ती संधी मिळाली असल्याचं मीरा सांगते.'इलू इलू' या मराठी चित्रपटात मीरा सोबत एली अवराम हि मिस पिंटो या मुख्य भूमिकेत झळकणार आहे. पण ही व्यक्तिरेखा यशस्वीपणे साकारण्यासाठी एलीनं खूप मेहनत घेतली आहे.

‘इलू इलू’ चित्रपटाची कथा, पटकथा, संवाद नितीन विजय सुपेकर यांचे आहेत. निर्माते बाळासाहेब फाळके आणि हिंदवी फाळके तर सहनिर्माते यश मनोहर सणस आहेत. छायांकन योगेश कोळी तर संकलन नितेश राठोड यांचे आहे. वैभव जोशी, वैभव देशमुख, प्रशांत मडपुवार यांच्या गीतांना अवधूत गुप्ते, ऋषिकेश रानडे, आर्या आंबेकर, रोहित राऊत, जनार्दन खंडाळकर यांचा स्वरसाज लाभला आहे. संगीत रोहित नागभिडे, विजय गवंडे यांचे आहे. कलादिग्दर्शक योगेश इंगळे आहेत.

---------------

हिंदुस्थान समाचार / Priyanka Avinash