वॉशिंग्टन, 17 ऑक्टोबर (हिं.स.)।अमेरिकेचे राष्ट्राध्यक्ष डोनाल्ड ट्रम्प यांचे माजी राष्ट्रीय सुरक्षा सल्लागार (एनएसए) जॉन बोल्टन यांच्यावर गोपनीय दस्तऐवज बेकायदेशीररीत्या साठवणे व शेअर करणे असे गंभीर आरोप ठेवण्यात आले आहेत. एकूण १८ प्रकरणांमध्ये त्यांच्यावर आरोपपत्र दाखल करण्यात आले आहे.

जॉन बोल्टन यांच्यावरील आरोप ऑगस्ट महिन्यात उघड झाले, जेव्हा एफबीआयने मेरीलँडमधील त्यांच्या घरी व वॉशिंग्टनमधील कार्यालयात झडती घेतली. झडतीदरम्यान असे अनेक दस्तऐवज जप्त करण्यात आले, ज्यावर “गोपनीय”, “गुप्त” किंवा “खुफिया” असे स्पष्टपणे नमूद होते. या कागदपत्रांमध्ये हत्यार नियंत्रण, राष्ट्रीय धोरणात्मक योजना, आणि संयुक्त राष्ट्रांशी संबंधित महत्त्वाची माहिती समाविष्ट होती.

जॉन बोल्टन यांनी ट्रम्प यांच्या पहिल्या कार्यकाळात १७ महिने राष्ट्रीय सुरक्षा सल्लागार म्हणून काम केले होते. मात्र, २०१९ मध्ये त्यांना हटवण्यात आले. त्यांच्या विरोधातील आरोप अधिक तीव्र झाले जेव्हा २०२० मध्ये त्यांनी “द रूम वेहेर इट हप्पेन्ड” हे पुस्तक प्रकाशित केले, ज्यात ट्रम्प यांच्या परराष्ट्र धोरणावर कडक टीका करण्यात आली होती. ट्रम्प प्रशासनाचा आरोप होता की या पुस्तकात संवेदनशील आणि गोपनीय माहिती प्रकाशित करण्यात आली आहे. मात्र, बोल्टन यांचे वकील म्हणाले की, व्हाइट हाऊसच्या नॅशनल सिक्युरिटी कौन्सिलने पुस्तकास प्रकाशनासाठी मंजुरी दिली होती.

ट्रम्प यांनी बोल्टन यांच्यावर टीका करत म्हटले की, “तो एक ‘वॉश्ड-अप’ आणि वेडा युद्धखोर माणूस आहे, जो देशाला थेट ‘वर्ल्ड वॉर सिक्स’कडे घेऊन गेला असता.” तसेच ट्रम्प म्हणाले की, बोल्टन यांनी कोणतीही उच्च-गोपनीय माहिती नसतानाही पुस्तक प्रकाशित केलं.कोर्टात सादर केलेल्या कागदपत्रांनुसार, जप्त करण्यात आलेल्या दस्तऐवजांमध्ये सामूहिक विनाश करणारी शस्त्रास्त्रे, राष्ट्रीय कूटनीतिक संवाद, आणि संयुक्त राष्ट्र मिशनशी संबंधित माहिती होती. मात्र, हे दस्तऐवज नेमक्या कोणत्या कालखंडातले आहेत, हे स्पष्ट करण्यात आलेले नाही.

कोर्टात सादर केलेल्या दस्तऐवजांमधील माहिती मोठ्या प्रमाणावर संपादित करण्यात आलेली असल्याने, बोल्टन यांच्याकडे नक्की कोणती माहिती होती आणि ती कितपत गोपनीय होती, हे अजूनही पूर्णतः स्पष्ट झालेलं नाही. सध्या हा संपूर्ण प्रकरण अमेरिकेच्या न्याययंत्रणेच्या कठोर तपासाअंतर्गत आहे आणि पुढील काही दिवसांत न्यायालयीन सुनावणी होण्याची शक्यता आहे.

बोल्टन यांचा अमेरिकन सरकारी सेवेत एक प्रदीर्घ आणि प्रभावशाली कारकीर्द राहिलेली आहे. त्यांनी रोनाल्ड रेगन प्रशासनात न्याय विभागात, जॉर्ज डब्ल्यू. बुश प्रशासनात शस्त्र नियंत्रणावर, आणि संयुक्त राष्ट्रात अमेरिका प्रतिनिधी म्हणून काम केले आहे. २०१८ मध्ये ट्रम्प यांनी त्यांची एनएसए म्हणून नियुक्ती केली होती, मात्र उत्तर कोरिया, इराण आणि युक्रेन यांसारख्या मुद्द्यांवर झालेल्या मतभेदांमुळे त्यांचा कार्यकाळ विवादग्रस्त राहिला आणि शेवटी २०१९ मध्ये ट्रम्प यांनी त्यांचा राजीनामा स्वीकारला.

---------------

हिंदुस्थान समाचार / Priyanka Bansode