अकोला, 19 ऑक्टोबर (हिं.स.)। अकोला शहरातील मलकापूर भागातील गोपाल फटाक्याच्या दुकानाला भीषण आग लागल्याची घटना घडली. या आगीत लाखो रुपयांचे फटाके जळून खाक झाले असून, परिसरात एकच गोंधळ उडाला. सुदैवाने मोठी जीवितहानी टळली असली तरी दुकानदार किरकोळ जखमी झाला आहे.
प्राथमिक माहितीनुसार, आग शॉर्टसर्किटमुळे लागल्याचे समोर आले आहे. अचानक धुराचे लोट निघत असल्याचे दिसताच दुकानमालकाने अग्निशमन सिलेंडरच्या साहाय्याने आग विझविण्याचा प्रयत्न केला. मात्र, त्यादरम्यान तो किरकोळ जखमी झाला आहे. घटनेची माहिती मिळताच अग्निशमन दलाचे जवान तात्काळ घटनास्थळी दाखल झाले. स्थानिक नागरिकांच्या मदतीने त्यांनी अथक प्रयत्नांनंतर आग आटोक्यात आणली. या वेळी परिसरात अफरातफर माजली होती, मात्र स्थानिक नागरिकांच्या सहकार्यामुळे मोठा अनर्थ टळला. सर्वात धक्कादायक बाब म्हणजे, सदर फटाका दुकानाकडे कोणतीही अधिकृत परवानगी नव्हती, अशी माहिती सूत्रांकडून मिळाली आहे. फटाके विक्रीसाठी अग्निशमन दल, पोलीस विभाग आणि प्रशा सनाची परवानगी घेणे कायद्याने बंधनकारक आहे. तरीही शहरात अशा अवैध दुकानांची संख्या वाढत असून, नागरिकांच्या जीवाशी मोठा धोका निर्माण झाला आहे. मिळालेल्या माहितीनुसार, अकोला शहरात सुमारे 120 फटाके दुकाने परवानगीशिवाय सुरू असल्याचा खुलासा झाला आहे. प्रशासनाचे या दुकानांवर सर्रास दुर्लक्ष होत असल्यामुळे गंभीर प्रश्न उपस्थित होत आहेत.
---------------
हिंदुस्थान समाचार / जयेश गावंडे