ढाका, 27 ऑक्टोबर (हिं.स.)। पाकिस्तानचे वरिष्ठ लष्करी अधिकारी जनरल साहिर शमशाद मिर्झा अलीकडेच बांग्लादेश भेटीवर आले होते. या भेटीदरम्यान मोहम्मद युनूस यांनी मिर्झा यांना ‘आर्ट ऑफ तिरुमप’ नावाचे पुस्तक भेट दिले. परंतु या पुस्तकाच्या मुखपृष्ठावरील नकाशामुळे मोठा वाद उद्भवला आहे. त्या नकाशात भारताचे ईशान्येकडील राज्य आसामपासून अरुणाचल प्रदेशपर्यंतचा भाग बांग्लादेशाचा हिस्सा दाखवला आहे.
युनूस यांनी मिर्झा यांना दिलेल्या या पुस्तकातील नकाशा कथितपणे त्या इस्लामिक दहशतवादी संघटनांच्या मागण्यांशी जुळतो, ज्या “ग्रेटर बांग्लादेश” या संकल्पनेचा प्रसार करीत आल्या आहेत. वास्तव पाहता, आजचा बांग्लादेश त्या पाकिस्तानच्या जवळ गेला आहे ज्याने एकेकाळी त्याच्यावर अमानुष अत्याचार केले होते. 1971 च्या मुक्तिसंग्रामानंतरपासूनच दोन्ही देशांतील संबंध ताणलेले राहिले आहेत. आता युनूस यांच्या नेतृत्वाखाली बांग्लादेश चालवला जात असल्याने ढाका आणि पाकिस्तान यांचे अप्राकृतिक मैत्रीपूर्ण संबंध उघडपणे दिसत आहेत.
हे पहिल्यांदाच नाही की युनूस यांनी भारताच्या ईशान्येकडील प्रदेशाबद्दल अशा निंदनीय टिप्पणी केल्या आहेत. एप्रिल 2025 मध्ये चीन भेटीदरम्यान त्यांनी म्हटले होते की, “भारताचे सात ईशान्य राज्य भूभागाने वेढलेले आहेत आणि बांग्लादेशच त्यांचे समुद्राशी जोडणारे प्रवेशद्वार आहे.” त्यांनी पुढे असेही म्हटले होते की, “ही स्थिती चीनच्या अर्थव्यवस्थेच्या विस्तारासाठी संधी ठरू शकते.”
भारताने युनूस यांच्या या वक्तव्यावर तीव्र आक्षेप घेतला होता. त्यांच्या विधानानंतर भारताने बांग्लादेशसोबतचा ट्रान्झिट करार रद्द केला, ज्याअंतर्गत बांग्लादेशचा माल भारताच्या मार्गे नेपाळ, भुटान आणि म्यानमारपर्यंत पोहोचवला जात होता. यानंतर युनूस यांच्याच जवळच्या एका माजी अधिकाऱ्याने असेही विधान केले होते की, “जर भारताने पाकिस्तानवर हल्ला केला, तर बांग्लादेशाने चीनसोबत मिळून भारताच्या ईशान्य भागावर कब्जा करावा.”
याशिवाय युनूस यांचे आणखी एक सहकारी नाहिदुल इस्लाम यांनी ‘ग्रेटर बांग्लादेश’चा नकाशा सोशल मीडियावर शेअर केला होता, ज्यामध्ये पश्चिम बंगाल, त्रिपुरा आणि आसामचा काही भाग बांग्लादेशात दाखवला गेला होता.
---------------
हिंदुस्थान समाचार / Priyanka Bansode
