जळगाव, 27 ऑक्टोबर (हिं.स.) जळगाव शहरातील एका मॉलमधील वॉशरूममध्ये एका 19 वर्षीय तरुणीचा आक्षेपार्ह व्हिडिओ बनवून विनयभंग केल्याचा प्रकार उघडकीस आला आहे. याप्रकरणी शहर पोलिसांत अल्पवयीन तरुणावर विनयभंगाचा गुन्हा दाखल करून त्याची सुधारगृहात रवानगी झाली.

ठाणे जिल्ह्यातील भाईंदर येथील १९ वर्षीय तरुणी जळगावात मामाकडे दिवाळीसाठी आली होती. गोविंदा स्टॉप जवळील नयनतारा मॉलमध्ये चित्रपट पाहण्यासाठी गेली होती. तिच्यासोबत तिची आई व मावशीही होते. चित्रपट सुरू असताना ती मॉलच्या वॉशरुममध्ये गेली. ती तिथे असताना १७ वर्षीय अल्पवयीन मुलाने तिचा अर्धनग्न व्हिडिओ तयार केला. हा प्रकार लक्षात आल्यानंतर तिला जबर धक्का बसला. तिने घाबरलेल्या अवस्थेत आपल्या आई व मावशीला झाल्या प्रकाराची माहिती दिली. यानंतर त्या अल्पवयीन तरुणाला पकडून पोलिसांच्या ताब्यात दिले. त्याला सुधारगृहात ठेवून रविवारी बाल न्यायालयासमोर हजर करण्यात आले. कोर्टाने त्याची सुधारगृहात रवानगी केल्याचे तपासी अधिकारी तथा शनिपेठ निरीक्षक कावेरी कमलाकर यांनी सांगितले. दरम्यान हा प्रकार घडल्यामुळे महिला सुरक्षेचा मुद्दा पुन्हा एकदा ऐरणीवर आला आहे.

---------------

हिंदुस्थान समाचार / मनोहर कांडेकर