अकोला, 30 ऑक्टोबर, (हिं.स.)

ठेवीदार शिक्षण व जनजागृती निधी अंतर्गत आर्थिक मालमत्तांच्या निकालीकरणासाठी अग्रणी बँकेच्या सहकार्याने शनिवार, १ नोव्हेंबर रोजी सकाळी ११ वाजता विशेष जिल्हास्तरीय शिबिराचे आयोजन करण्यात आले आहे.

नियोजन भवन, जिल्हाधिकारी कार्यालय अकोला येथे हे शिबिर होणार आहे. शिबिरात खातेदारांच्या दावा न केलेल्या ठेवींचे निराकरण करणे तसेच ग्राहकांच्या तक्रारींचे निवारण करण्यात येणार आहे. जिल्ह्यातील सर्व बँका या शिबिरात सहभागी होणार आहेत.

ठेवीदार शिक्षण व जनजागृती निधीअंतर्गत सर्व नामनिर्देशित, पात्र लाभार्थ्यांनी या शिबिरास उपस्थित राहावे, असे आवाहन करण्यात आले आहे.

वित्तीय सेवा विभाग आणि राज्यस्तरीय बँक समिती यांच्या निर्देशानुसार हे शिबिर होत आहे. या उपक्रमामुळे खातेदारांना त्यांच्या हक्काच्या ठेवी परत मिळवण्याची संधी मिळणार आहे.

१० वर्षांहून अधिक काळ ज्या ठेवींवर दावा केलेला नाही, अशा ठेवी ‘ठेवीदार शिक्षण व जागरूकता निधी’ मध्ये हस्तांतरित करण्यात येतात. खातेदारांना त्या परत मिळवण्याचा पूर्ण अधिकार असल्यामुळे नागरिकांनी या शिबिराचा लाभ घ्यावा, असे आवाहन अग्रणी बँक जिल्हा प्रबंधक नयन सिन्हा यांनी केले आहे.

---------------

हिंदुस्थान समाचार / जयेश गावंडे