भुसावळ , 31 ऑक्टोबर (हिं.स.) भुसावळच्या एका निवृत्त बँक अधिकाऱ्याला साडेतीन लाखांचा चुना लावण्यात भामट्याला यश आले. घरबसल्या ऑनलाइन पद्धतीने हयातीचा दाखला काढून देण्याच्या बहाण्याने ही फसवणूक झाली असून फसवणूक करणाऱ्याने अवघ्या १५ मिनिटांत त्यांच्या खात्यातील रक्कम उडवली. याबाबत भुसावळ शहर पोलिस ठाण्यात गुन्हा दाखल झाला आहे.

भुसावळ शहरातील डी. एस. ग्राउंड परिसरातील रहिवासी बँक ऑफ बडोदामधून निवृत्त झालेले अधिकारी आहेत. फेसबुकवर ‘हयातीचा दाखला ऑनलाइन करा, घरबसल्या सोयीस्कर सेवा’ अशी जाहिरात पाहून त्यांनी संबंधित लिंक उघडली. त्यात बँकेचे नाव, शाखा आणि मोबाइल क्रमांक अशी माहिती भरली. ही घटना २३ सप्टेंबर रोजी घडली. यानंतर २४ ऑक्टोबर रोजी झारखंड येथून स्वतःला पडताळणी करणारा अधिकारी सांगणाऱ्या भुपेंद्रदास गुप्ता नावाच्या व्यक्तीचा फोन आला. तुम्ही पाठवलेल्या माहितीची पडताळणी करायची आहे असे सांगत त्याने व्हॉट्सअॅपवर कॉल केला. त्यादरम्यान मेल आयडी आणि पासवर्ड विचारून फोन सुरू ठेवा अशी सूचना केली. काही मिनिटांतच त्यांच्या खात्यातील ३ लाख ५६ हजार रूपयांपैकी ३ लाख ५० हजार रूपये ऑनलाइन वळते केले. दरम्यान, सायबर ठग नागरिकांना फसवण्यासाठी वेगवेगळे बहाणे सांगतात. त्यामुळे खबरदारी घ्यावी असे आवाहन डीवायएसपी गावित यांनी केले. फसवणूक झाल्याचे लक्षात येताच संबंधितांनी बँक ऑफ बडोदा शाखेत धाव घेतली. मुंबई मुख्यालयातही कळवले. पण, तोपर्यंत संपूर्ण रक्कम भामट्यांनी काढली होती. या प्रकरणी जळगाव येथील सायबर सेलमध्ये माहिती देण्यात आली. भुसावळ शहर पोलिस ठाण्यात गुन्हा दाखल झाला आहे.

---------------

हिंदुस्थान समाचार / मनोहर कांडेकर