नवी दिल्ली , 5 नोव्हेंबर (हिं.स.)।गुरुनानक देवजींच्या प्रकाश पर्वानिमित्त सुमारे 2,100 भारतीय शीख भक्त मंगळवारी वाघा सीमेच्या मार्गे पाकिस्तानात पोहोचले. मे महिन्यात दोन्ही देशांदरम्यान चार दिवस चाललेल्या संघर्षानंतर हे पहिल्यांदाच लोकांमधील थेट संपर्काचे उदाहरण आहे. पाकिस्तान सरकारने गुरुनानक देवजींच्या जयंतीनिमित्त भारतीय शीख यात्रेकरूंना 2,150 व्हिसा जारी केले होते.
अकाल तख्तचे जत्थेदार ज्ञानी कुलदीप सिंग गर्गज यांच्या नेतृत्वाखालील हे श्रद्धाळू अटारी-वाघा सीमा पार करून लाहोर येथे पोहोचले, जिथे पंजाब प्रांताचे मंत्री रमेश सिंग अरोरा आणि पाकिस्तान इवॅक्यूई ट्रस्ट बोर्ड (ईटीबी) चे अधिकारी यांनी फुलवृष्टी करून त्यांचे उत्साहाने स्वागत केले. श्रद्धाळू लाहोरमधील ननकाना साहिब आणि करतारपूर साहिबसह इतर ऐतिहासिक गुरुद्वारांमध्ये माथा टेकणार आहेत.
पहलगाम हल्ला आणि त्यानंतर झालेल्या ‘ऑपरेशन सिंदूर’मुळे भारत-पाकिस्तान दरम्यान वाढलेल्या तणावानंतर पाकिस्तानात जाणारा हा पहिला शीख यात्रेकरूंचा जत्था आहे.
ईटीपीबीचे प्रवक्ते गुलाम मोहिउद्दीन यांनी सांगितले की, भारतीय तीर्थयात्री विशेष बसद्वारे गुरुद्वारा जन्मस्थान ननकाना साहिबकडे रवाना झाले आहेत. गुरु नानक जयंतीचा मुख्य सोहळा बुधवारी लाहोरपासून सुमारे 80 किलोमीटर अंतरावर असलेल्या गुरुद्वारा जन्मस्थान येथे होणार आहे. जन्मस्थान आणि करतारपूरसह सर्व गुरुद्वारे सुंदर प्रकाशाने सजविण्यात आले आहेत. तेथे सुरक्षा व्यवस्था अत्यंत मजबूत करण्यात आली आहे.
---------------
हिंदुस्थान समाचार / Priyanka Bansode
