जळगाव, 5 नोव्हेंबर (हिं.स.) सोशल मीडियावरील ओळखीच्या माध्यमातून एका डॉक्टरांना तब्बल २८ लाख रुपयांचा फसवा गंडा बसल्याची धक्कादायक घटना समोर आली आहे. फेसबुकवरून ओळख वाढवून आणि ऑनलाईन गुंतवणुकीतून अधिक नफा मिळवून देण्याचे आमिष दाखवून सायबर ठगाने अमळनेर येथील डॉ. विकास सोमेश्वर पवार यांची २७ लाख ९५ हजार ६३० रुपयांची फसवणूक केली. या प्रकरणी डॉ. पवार यांनी जळगाव सायबर पोलिसात तक्रार दाखल केली असून गुन्हा नोंदविण्यात आला आहे.

अमळनेर येथील मुंदडा नगर भागात राहणारे आणि ‘कृष्णा डेंटल क्लिनिक’ चालवणारे डॉ. विकास पवार (वय ४८) हे फेसबुकवर सक्रिय असतात. ऑक्टोबर २०२५ मध्ये त्यांना ‘अंकिता देसाई’ नावाच्या महिलेची फ्रेंड रिक्वेस्ट आली. ओळख वाढल्यानंतर या महिलेने ‘ट्रस्ट बुकिंग कस्टमर सर्व्हिस’ नावाची कंपनी असल्याचे सांगत, त्यामध्ये पैसे गुंतवल्यास मोठा नफा मिळेल, असे आमिष दाखवले. तिने टेलिग्रामद्वारे संपर्क साधत ‘रिव्ह्यू टास्क’ पूर्ण केल्यास कमाई होईल असे सांगितले. सुरुवातीला डॉ. पवार यांनी १० हजार रुपये गुंतवले. या गुंतवणुकीनंतर अॅपमध्ये ९०० रुपयांचा नफा दिसल्याने त्यांचा विश्वास बसला. त्यानंतर वारंवार टास्क पूर्ण करण्याच्या बहाण्याने वेगवेगळ्या खात्यांवर पैसे भरण्यास सांगण्यात आले. अशाप्रकारे डॉ. पवार यांनी टप्प्याटप्प्याने २७ लाख ९५ हजार ६३० रुपये भरले. अॅपमध्ये त्यांना ३६ लाख ८२ हजार २७५ रुपयांचा नफा दाखवण्यात आला होता. मात्र जेव्हा त्यांनी ती रक्कम परत काढण्याचा प्रयत्न केला तेव्हा पैसे ट्रान्सफर होत नसल्याचे दिसले. संशय आल्यावर त्यांनी ‘अंकिता देसाई’शी संपर्क साधला असता तीने उडवाउडवीची उत्तरे देत आणखी पैशांची मागणी केली. आपली फसवणूक झाल्याचे लक्षात येताच डॉ. पवार यांनी २९ ऑक्टोबर रोजी सायबर पोर्टलवर तक्रार दाखल केली. त्यानुसार जळगाव सायबर पोलिस ठाण्यात गुन्हा नोंदविण्यात आला असून तपास सुरू आहे.

---------------

हिंदुस्थान समाचार / मनोहर कांडेकर