मालेगाव, 5 नोव्हेंबर (हिं.स.)।

- पाचशे रुपयांच्या बनावट रॅकेट प्रकरणी मदरशा मधून हा सगळा गोरख धंदा सुरू असल्याचे समोर आले आहे यामध्ये एक डॉक्टर देखील प्रमुख असून तो या नोटा बाजारात आणण्यासाठी देत असल्याचे समोर आले आहे पण त्याला महाराष्ट्र पोलीस मध्य प्रदेश मध्ये आल्याची माहिती मिळाल्यानंतर हा डॉक्टर फरार झाला आहे पोलीस त्याचा शोध घेत आहे

याबाबत अधिक माहिती अशी की दिवाळी झाल्यानंतर

मालेगाव तालुका पोलिसांनी पाचशे रुपयांच्या दोन हजार नोटा म्हणजे १० लाखांच्या नकली नोटांसह दोघा परप्रांतीयांना पकडले. त्यानंतर नकली चलन रॅकेटची मोठी व्याप्ती असल्याचे तसेच मध्यप्रदेश व महाराष्ट्र या दोन राज्यांमध्ये त्याचे नेटवर्क पसरल्याचे समोर आले. याप्रकरणी आतापर्यंत चार जणांना अटक करण्यात आली आहे. संशयीतांकडून आपल्या हस्तकांना निम्म्या किंमतीत या बनावट नोटा विक्री करण्यात येत होत्या व त्यानंतर हस्तक या नोटा चलनात आणत असल्याचे पोलीस तपासात समोर आले आहे. प्रारंभी बऱ्हाणपूर येथील मौलाना महंम्मद जुबेर व नाझीर अक्रम अन्सारी या दोघांना नकली नोटांसह पकडण्यात आले होते.

मौलाना महंमद हा मध्यप्रदेशातील खंडवा जिल्ह्यातील पैठिया गावामधील मशिदीमध्ये इमाम आहे. मालेगाव पोलिसांनी त्याला पकडल्यावर मध्य प्रदेश पोलिसांनी त्याचे वास्तव्य असलेल्या मदरशामधील खोलीची झडती घेतली असता तेथे पाचशे रुपयांच्या १९ लाख ७८ लाखांच्या बनावट नोटा आढळून आल्या. मौलाना जुबेर याने यापूर्वी दिपवाळी काळात मालेगावमधील तौसिफ यास सहा लाखाचे बनावट चलन दिले होते. त्यातील साडेतीन लाखाच्या नकली नोटा त्याने चलनात आणल्याची माहिती पुढे आली आहे. उर्वरित नोटा पोलिसांनी जप्त केल्या आहेत. मौलाना व नाजीर हे आता देखील १० लाखांच्या बनावट नोटा त्यालाच देण्यासाठी मालेगावात आले होते. मात्र गुप्त माहिती मिळाल्याने पोलिसांनी लावलेल्या सापळ्यात तत्पूर्वीच ते अलगद अडकले.

मौलाना महंमद याला डॉ. प्रतीक नवलखा हा नकली नोटा देत असल्याचे पोलीस तपासात निष्पन्न झाले आहे. अटक केलेल्या मौलानाच्या मार्फत संपर्क साधून त्याला पकडण्यासाठी पोलिसांनी प्रयत्न केला, परंतु मौलाना व त्याचा साथीदार पकडला गेल्याचे लक्षात आल्यानंतर तो फरार झाला आहे. डॉ. प्रतीक नवलखा हा बऱ्हाणपूर येथील जिल्हा रुग्णालयात निवासी वैद्यकीय अधिकारी असताना त्याच्या विरोधात आर्थिक घोटाळ्याप्रकरणी गुन्हा दाखल झाला होता. त्यामुळे त्याला निलंबित करण्यात आले होते. नकली चलन रॅकेटमध्ये तो मास्टरमाईंड असल्याचे समोर आल्यानंतर मध्य प्रदेश पोलिसांनी बऱ्हाणपूर येथील त्याच्या मालमत्ता 'सील' केल्याचे सांगण्यात आले.

---------------

हिंदुस्थान समाचार / GOSAVI CHANDRASHEKHAR SUKDEV