नवी दिल्ली, १५ डिसेंबर (हिं.स.). अर्जेंटिनाचा फुटबॉल दिग्गज लिओनेल मेस्सीने त्याच्या गॉट इंडिया टूर दरम्यान मिळालेल्या प्रचंड प्रेमाबद्दल त्याच्या चाहत्यांचे आभार मानले आणि तो अनुभव त्याच्यासाठी खूप खास आणि संस्मरणीय असल्याचे सांगितले.
अरुण जेटली स्टेडियममधील फुटबॉलप्रेमींना संबोधित करताना मेस्सी म्हणाला, तुम्ही भारतात आम्हाला दिलेल्या सर्व प्रेमाबद्दल धन्यवाद. हा आमच्यासाठी एक अनोखा अनुभव होता. हा दौरा कदाचित लहान आणि धावपळीचा असेल, पण आम्हाला मिळालेले प्रेम अविश्वसनीय होते. आम्हाला आधीच माहित होते की येथे आमच्यासाठी प्रेम आहे. पण ते जवळून अनुभवणे आश्चर्यकारक होते. आम्ही निश्चितच पुन्हा एकदा भारतात परतू.आयसीसी अध्यक्ष जय शाह यांनी मेस्सीला टी-२० विश्वचषक तिकिटे, स्वाक्षरी केलेली जर्सी आणि बॅट भेट दिली. गॉट इंडिया टूरच्या शेवटच्या टप्प्यात, आयसीसीचे अध्यक्ष जय शाह यांनी मेस्सीला भारत विरुद्ध अमेरिका पुरुष टी-२० विश्वचषक २०२६ साठी तिकिटे प्रदान केली. दिल्लीतील अरुण जेटली स्टेडियममध्ये हा कार्यक्रम आयोजित करण्यात आला होता, ज्यामध्ये दिल्लीच्या मुख्यमंत्री रेखा गुप्ता आणि डीडीसीए अध्यक्ष रोहन जेटली उपस्थित होते. जय शाह यांनी मेस्सीला फ्रेम केलेले क्रिकेट बॅट आणि टीम इंडियाची जर्सी देखील भेट दिली. मेस्सीसोबत उपस्थित असलेले रॉड्रिगो डी पॉल आणि लुईस सुआरेझ यांनीही स्मृतिचिन्हे स्वीकारली.
महिला प्रीमियर लीगमध्ये वेस्ट हॅम युनायटेडचे प्रतिनिधित्व करणाऱ्या माजी भारतीय गोलकीपर अदिती चौहान यांनी तिन्ही पाहुण्यांना स्वाक्षरी केलेले टी-शर्ट प्रदान केले.दाट धुक्यामुळे दिल्लीत मेस्सीची चार्टर्ड फ्लाइट उशिरा आली, त्यानंतर तो थेट द लीला पॅलेस हॉटेलमध्ये गेला आणि एका खाजगी भेट-अँड-ग्रीट कार्यक्रमात सहभागी झाला.कोलकात्यातील साल्ट लेक स्टेडियममध्ये गोंधळामुळे गॉट इंडिया टूरची सुरुवात कठीण झाली, जिथे प्रचंड गर्दीचे व्यवस्थापन करणे आयोजकांसाठी एक आव्हान होते. त्यानंतर, मेस्सीने हैदराबादमध्ये मुलांसोबत फुटबॉल खेळला आणि उप्पल स्टेडियममधील व्हीआयपी बॉक्समधून प्रेक्षकांचे स्वागत केले.मुंबईत, मेस्सीने ऐतिहासिक वानखेडे स्टेडियमवर क्रिकेट दिग्गज सचिन तेंडुलकर, महाराष्ट्राचे मुख्यमंत्री देवेंद्र फडणवीस, क्रीडा क्षेत्रातील व्यक्ती, चित्रपट तारे आणि इतर मान्यवरांची भेट घेतली.-----------------
हिंदुस्थान समाचार / वृषाली देशपांडे
