वॉशिंग्टन, 17 डिसेंबर (हिं.स.)।सिडनीतील बॉन्डी बीच येथे ज्यू हनुक्का उत्सवाच्या वेळी झालेल्या गोळीबाराच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी मोठे विधान केले आहे. त्यांनी कट्टरपंथी इस्लामी दहशतवादाविरोधात सर्व देशांनी एकत्र येण्याचे आवाहन केले आहे. या दहशतवादी हल्ल्यात एकूण १६ जणांचा मृत्यू झाला होता.

व्हाइट हाऊसमध्ये हनुक्काच्या तिसऱ्या रात्री आयोजित उत्सवाच्या वेळी डोनाल्ड ट्रम्प यांनी बॉन्डी बीच हल्ल्यातील पीडितांना श्रद्धांजली अर्पण केली. व्हाइट हाऊसमध्ये आयोजित हनुक्का रिसेप्शनमध्ये ट्रम्प यांनी ज्यू समुदायाला नेहमीच पाठिंबा देण्याचा संकल्प व्यक्त केला. “कट्टरपंथी इस्लामी दहशतवादाच्या दुष्टतेविरोधात सर्व देशांनी एकजुटीने उभे राहिले पाहिजे. मी ज्यू समुदायाचा नेहमीच मित्र आणि समर्थक राहीन,” असे ते म्हणाले.

ऑस्ट्रेलियाच्या जनतेला प्रेम आणि प्रार्थनांचा संदेश देताना अमेरिकेच्या राष्ट्राध्यक्षांनी सांगितले, “या हल्ल्यात मृत्यूमुखी पडलेल्या सर्वांच्या दुःखात आम्ही एकत्र आहोत आणि जखमींच्या लवकर बरे होण्यासाठी प्रार्थना करतो. काही जण अत्यंत गंभीर अवस्थेत आहेत.”

इस्लामिक स्टेटशी संबंधित या हल्ल्याबाबत ऑस्ट्रेलियाचे पंतप्रधान अँथनी अल्बनीज यांनी सांगितले की तपासाचे निष्कर्ष ठोस पुराव्यांवर आधारित आहेत. घटनास्थळी एक वाहन सापडले असून त्यावर आयएसचा झेंडा लावलेला होता. संशयित दहशतवादी बेटे नावेद अकरम आणि वडील साजिद अकरम यांच्याबाबत तपास यंत्रणांना अनेक महत्त्वाची माहिती मिळाली आहे.

अल्बनीज तसेच इतर अनेक ऑस्ट्रेलियन नेत्यांनी देशातील शस्त्रांशी संबंधित कायदे अधिक कठोर करण्याची गरज व्यक्त केली आहे. ऑस्ट्रेलियामधील यापूर्वीचा सर्वात मोठा हल्ला 1996 मध्ये तस्मानियामध्ये झाला होता, ज्यामध्ये 35 जणांचा मृत्यू झाला होता.

---------------

हिंदुस्थान समाचार / Priyanka Bansode