रायगड, 2 डिसेंबर, (हिं.स.)। स्थानिक स्वराज्य संस्थांच्या निवडणुकीच्या धामधुमीत महाडमध्ये राजकीय वातावरण अचानक तापले असून भाजप नेते भारतशेठ गोगावले आणि राष्ट्रवादी गटाचे अरुण जगताप हे आमने-सामने आले आहेत. निवडणूक प्रचारादरम्यान झालेल्या एका धक्कादायक घटनेनंतर दोन्ही बाजूंनी परस्परांवर गंभीर आरोपांची मालिका सुरू झाली आहे.
गोगावले यांनी पत्रकार परिषद घेऊन आपल्या ताफ्यावर नियोजित हल्ला झाल्याचा आरोप केला. “हा साधासुधा प्रकार नसून मला लक्ष्य करण्यासाठी पूर्वनियोजित पद्धतीने गोंधळ उभा करण्यात आला,” असा दावा त्यांनी केला. त्यांनी काही कार्यकर्त्यांना दुखापत झाल्याचेही सांगितले. गोगावले यांच्या मते, हा हल्ला निवडणूक वातावरण बिघडवण्यासाठी आणि मतदारांमध्ये भ्रम निर्माण करण्यासाठी करण्यात आला.
दरम्यान, या आरोपांवर राष्ट्रवादीचे अरुण जगताप यांनी जोरदार पलटवार केला. त्यांनी हा प्रकार जाणूनबुजून ‘हल्ल्याचा बनाव’ तयार करून सहानुभूती मिळवण्याचा प्रयत्न असल्याचा आरोप केला. “गोगावले यांनी स्वतःवर हल्ला झाल्याचे नाटक रचले. प्रत्यक्षात कुठलाही हल्ला झालाच नाही,” असे प्रतिपादन जगताप यांनी केले. त्यांनी पोलिसांकडे संपूर्ण घटनेचा तपास करण्याची मागणीही केली असून “सत्य बाहेर आल्याशिवाय आम्ही शांत बसणार नाही,” असा इशाराही दिला.
घटनेनंतर पोलिसांनी त्या परिसरात अतिरिक्त बंदोबस्त तैनात करून परिस्थिती नियंत्रणात ठेवली आहे. दोन्ही गटांचे समर्थक एकमेकांवर सोशल मीडियावरही टीका-टिप्पणी करत असल्याने वातावरण अधिकच तापले आहे.
महाडमध्ये निवडणुकीपूर्वीच अशा प्रकारचे आरोप-प्रत्यारोप होणे ही गंभीर बाब असून, या वादाचा थेट परिणाम मतदानाच्या दिवशीतील शांततेवर होणार का, याबद्दल नागरिकांत चर्चा आहे. प्रशासनाने दोन्ही पक्षांना संयम पाळण्याचे आवाहन करत तपासाचे काम सुरू केले आहे.
---------------
हिंदुस्थान समाचार / संदेश साळुंके
14 Dec 2025
