लखनऊ, 20 डिसेंबर (हिं.स.)। बहुजन समाज पार्टीच्या (बसपा) प्रमुख मायावती यांनी बिहारचे मुख्यमंत्री नितीश कुमार यांच्यावर टीका केली आहे. एका मुस्लिम महिला डॉक्टरचा हिजाब काढण्यात आल्याचा वाद त्यांनी दु:खद आणि दुर्दैवी असल्याचे म्हटले आहे. मुख्यमंत्र्यांयांनी या प्रकरणाबाबत पश्चात्ताप करून तेथेच विषय संपवावा, असेही त्यांनी स्पष्ट केले. यासोबतच त्यांनी बहराइचमधील पोलीस परेड, उत्तर प्रदेश विधानसभा आणि संसदेत सुरू असलेल्या हिवाळी अधिवेशनावरही प्रतिक्रिया व्यक्त केली आहे.

बसपा प्रमुख मायावती यांनी शनिवारी सोशल मीडिया प्लॅटफॉर्म ‘एक्स’वर लिहिले की, बिहारचे मुख्यमंत्री नितीश कुमार यांनी डॉक्टरांना नियुक्तीपत्रांचे वाटप करताना आयोजित केलेल्या सार्वजनिक कार्यक्रमात एका मुस्लिम महिला डॉक्टरचा हिजाब (चेहऱ्याचा नकाब) काढण्याचा प्रकार घडला. हा विषय सुटण्याऐवजी, विशेषतः मंत्री आणि इतर नेत्यांच्या वक्तव्यांमुळे, अधिकच वादग्रस्त बनत चालला आहे. ही बाब अत्यंत दु:खद आणि दुर्दैवी आहे. प्रथमदर्शनीच हा प्रकार महिला सुरक्षे आणि सन्मानाशी संबंधित असल्यामुळे मुख्यमंत्री यांच्या थेट हस्तक्षेपातून आतापर्यंत तो सुटायला हवा होता. विशेषतः विविध ठिकाणी अशा प्रकारच्या इतर घटनाही समोर येत असताना, मुख्यमंत्री यांनी हा प्रकार योग्य दृष्टीकोनातून पाहून त्याबाबत पश्चात्ताप व्यक्त करावा, असे त्यांनी म्हटले आहे.

पोलीस परेडशी खेळ करू नये

मायावती यांनी उत्तर प्रदेशातील बहराइच येथे पोलीस परेडदरम्यान एका कथावाचकाला सलामी देण्यात आल्याच्या घटनेवरही प्रश्नचिन्ह उपस्थित केले. त्यांनी लिहिले की, बहराइच जिल्हा पोलीस दलाने पोलीस परेडमधील प्रस्थापित नियमांना बाजूला सारून एका कथावाचकाला सलामी दिल्याचा प्रकारही वादात सापडला आहे. पोलीस परेड आणि सलामी यांची स्वतःची परंपरा, नियम, मर्यादा, शिस्त आणि पवित्रता असते. याबाबतीत कोणत्याही प्रकारचा खेळ किंवा हलगर्जीपणा होता कामा नये. उत्तर प्रदेशचे पोलीस महासंचालक यांनी या घटनेची दखल घेऊन जिल्हा पोलीस अधीक्षकांकडून खुलासा मागवला, ही चांगली बाब आहे, असेही त्यांनी नमूद केले.

जनकल्याणाच्या मुद्द्यांपासून दूर हिवाळी अधिवेशन

बसपा प्रमुखांनी उत्तर प्रदेश विधानसभा हिवाळी अधिवेशनालाही जनहिताच्या मुद्द्यांपासून दूर असल्याचे सांगितले. त्यांनी म्हटले की, 19 डिसेंबरपासून सुरू झालेल्या उत्तर प्रदेश विधानसभेच्या अल्पकालीन हिवाळी अधिवेशनातही, मागील अधिवेशनांप्रमाणेच, जनहित आणि जनकल्याणाच्या मुद्द्यांवर चर्चा न होता सत्ताधारी पक्ष आणि विरोधकांमधील आरोप-प्रत्यारोपांमध्येच वेळ गेला. सरकारने शेतकऱ्यांसाठी खतांच्या समस्येसह जनहिताशी संबंधित इतर प्रश्नांवर आणि जनकल्याणाच्या विषयांवर गंभीरपणे विचार करून सभागृहात जबाबदारीने उत्तर द्यायला हवे होते, असेही त्यांनी सांगितले.

याशिवाय, संसदेत सुरू असलेल्या हिवाळी अधिवेशनात वायू प्रदूषणासारख्या गंभीर मुद्द्यांवर चर्चा न होणे हेही त्यांनी दुर्दैवी असल्याचे म्हटले. तसेच बांगलादेशात वाढत असलेल्या भारतविरोधी कारवायांच्या पार्श्वभूमीवर केंद्र सरकारने दीर्घकालीन धोरण स्वीकारावे, अशी मागणीही मायावती यांनी केली आहे.

---------------

हिंदुस्थान समाचार / Suraj Chaugule