रायगड, 21 डिसेंबर (हिं.स.)।

वाहतुकीचे नियम मोडणाऱ्यांवर कठोर पावले उचलत दिनांक २० डिसेंबर २०२५ रोजी २८ पोलीस ठाण्यांच्या अखत्यारीत वाहतूक शाखेच्या अधिकारी व कर्मचाऱ्यांनी विशेष मोहीम राबवली. या मोहिमेत वाहतुकीचे नियम भंग करणाऱ्या एकूण २७६ इसमांवर कायदेशीर कारवाई करण्यात आली असून त्यांच्याकडून एकूण २ लाख ५९ हजार ४०० रुपयांचा दंड वसूल करण्यात आला आहे.

शहर व उपनगरांमध्ये वाढती वाहतूक कोंडी, अपघातांचे प्रमाण आणि नागरिकांच्या सुरक्षिततेचा प्रश्न लक्षात घेता पोलीस प्रशासनाने ही व्यापक कारवाई हाती घेतली. हेल्मेट न घालता दुचाकी चालवणे, सीटबेल्ट न लावणे, नो-पार्किंगमध्ये वाहन उभे करणे, सिग्नल तोडणे, ओव्हरस्पीडिंग, चुकीच्या पद्धतीने वाहन चालवणे आदी विविध प्रकारच्या नियमभंगावर कारवाई करण्यात आली.

वाहतूक शाखेच्या पथकांनी प्रमुख चौक, मुख्य रस्ते, बाजारपेठा तसेच गर्दीच्या ठिकाणी नाकाबंदी व तपासणी केली. या दरम्यान नियम मोडणाऱ्या वाहनचालकांना थांबवून दंड आकारण्यात आला तसेच त्यांना वाहतूक नियमांचे महत्त्व समजावून सांगण्यात आले. काही वाहनचालकांकडून आवश्यक कागदपत्रांचीही तपासणी करण्यात आली.

पोलीस प्रशासनाने दिलेल्या माहितीनुसार, ही कारवाई केवळ दंड वसुलीसाठी नसून नागरिकांमध्ये वाहतूक नियमांबाबत शिस्त निर्माण करणे, अपघात टाळणे आणि रस्त्यांवरील सुरक्षितता वाढवणे हा मुख्य उद्देश आहे. नियमांचे पालन केल्यास अपघातांचे प्रमाण मोठ्या प्रमाणात कमी होऊ शकते, असेही पोलिसांनी स्पष्ट केले.

दरम्यान, वाहतुकीचे नियम पाळणे ही प्रत्येक नागरिकाची जबाबदारी असून नियमभंग केल्यास भविष्यातही अशाच कठोर कारवाया सुरू राहतील, असा इशारा वाहतूक पोलिसांनी दिला आहे. नागरिकांनी स्वतःच्या व इतरांच्या सुरक्षिततेसाठी नियमांचे काटेकोर पालन करावे, असे आवाहनही यावेळी करण्यात आले.

---------------

हिंदुस्थान समाचार / संदेश साळुंके