नवी दिल्ली , 21 डिसेंबर (हिं.स.)।रशियाने भारतीय विद्यार्थ्यांसाठी एक मोठी घोषणा केली आहे. आता रशियामध्ये भारतीय विद्यार्थ्यांना कोणतीही प्रवेश परीक्षा (एंट्रन्स एक्झाम) न देता सरकारी शिष्यवृत्ती दिली जाणार आहे. या शिष्यवृत्ती पदवी अभ्यासक्रमांपासून ते उच्च शिक्षण व प्रगत प्रशिक्षण अभ्यासक्रमांपर्यंत उपलब्ध असतील. निवड ही विद्यार्थ्यांच्या शैक्षणिक कामगिरी आणि पोर्टफोलिओच्या आधारे केली जाणार आहे.

रशियन प्रशासनानुसार, या शिष्यवृत्ती पदवी, पदव्युत्तर, पीएचडी तसेच प्रगत प्रशिक्षण अभ्यासक्रमांना लागू असतील. यामध्ये वैद्यकशास्त्र, अभियांत्रिकी, फार्मसी, अंतराळ अध्ययन (स्पेस स्टडीज) यांसारख्या विषयांचा समावेश आहे. अनेक अभ्यासक्रम इंग्रजी भाषेतही उपलब्ध आहेत. तसेच, ज्यांना रशियन भाषा येत नाही त्यांच्यासाठी एक वर्षाचा तयारीचा (प्रीपरेटरी) भाषा अभ्यासक्रमाचा पर्यायही देण्यात आला आहे. जे विद्यार्थी रशियन भाषा शिकू इच्छितात, ते आपली मुख्य शिक्षणप्रक्रिया सुरू करण्यापूर्वी एक वर्षाचा प्रारंभिक भाषा अभ्यासक्रम करू शकतात.

रशियन फेडरेशन 2026–27 या शैक्षणिक वर्षासाठी आपल्या सरकारी शिष्यवृत्ती कार्यक्रमांतर्गत भारतीय विद्यार्थ्यांना आमंत्रित करत आहे. या कार्यक्रमाचा मुख्य उद्देश भारतीय विद्यार्थ्यांना रशियातील विविध विद्यापीठांमध्ये आणि विविध विषयांमध्ये उच्च शिक्षण घेण्यासाठी मदत करणे हा आहे. अहवालानुसार, या शिष्यवृत्तीसाठी अर्ज प्रक्रिया सुरू झाली असून विद्यार्थ्यांना मॉस्को, सेंट पीटर्सबर्ग, कझान, व्लादिवोस्तोक, कॅलिनिनग्राड तसेच इतर अनेक भागांतील रशियन विद्यापीठांमध्ये शिक्षण घेण्याची संधी मिळू शकते.

या शिष्यवृत्तीची सर्वात महत्त्वाची बाब म्हणजे निवड प्रक्रियेत कोणतीही प्रवेश परीक्षा नाही. उमेदवारांची निवड त्यांच्या आधीच्या शैक्षणिक कामगिरी आणि पोर्टफोलिओच्या आधारे केली जाणार आहे. पोर्टफोलिओमध्ये संशोधन लेख, शिफारसपत्रे, राष्ट्रीय किंवा आंतरराष्ट्रीय स्पर्धा व ऑलिम्पियाडची प्रमाणपत्रे तसेच इतर पूरक कागदपत्रांचा समावेश असू शकतो.

पहिला टप्पा 15 जानेवारीपर्यंत चालेल. या टप्प्यात कागदपत्रांची पडताळणी आणि प्राथमिक निवड प्रक्रिया समाविष्ट असेल. दुसऱ्या टप्प्यात, रशियाचे विज्ञान आणि उच्च शिक्षण मंत्रालय सहभागी विद्यापीठांच्या सहकार्याने विद्यार्थ्यांना संबंधित संस्थांमध्ये प्रवेश देईल आणि व्हिसासाठी आवश्यक कागदपत्रे जारी करेल. इच्छुक उमेदवार अधिक माहितीसाठी अधिकृत संकेतस्थळ education-in-russia.com ला भेट देऊ शकतात.

---------------

हिंदुस्थान समाचार / Priyanka Bansode