सहकार मंत्र्यांच्या हस्ते यात्रेला प्रारंभ
लातूर, 26 डिसेंबर (हिं.स.)। हृदयात रामनाम, पायात जिद्द आणि मनात मानवतेची एकता... हा उदात्त विचार घेऊन अहमदपूर येथील ११ सायकलपटू शुक्रवारी अयोध्येकडे झेपावले आहेत. अहमदपूर सायकलिस्ट क्लब, रोटरी क्लब आणि रनर्स ग्रुप यांच्या संयुक्त विद्यमाने आयोजित या १२५१ किलोमीटर सायकल यात्रेचा शुभारंभ आज सकाळी ९ वाजता छत्रपती शिवाजी महाराज चौक येथे मोठ्या उत्साहात झाला.
सहकार मंत्र्यांकडून कौतुक आणि शुभेच्छा
महाराष्ट्राचे सहकार मंत्री बाबासाहेब पाटील यांनी या यात्रेला हिरवा झेंडा दाखवून रवाना केले. यावेळी बोलताना त्यांनी सायकलपटूंच्या साहसाचे भरभरून कौतुक केले. मंत्री महोदय म्हणाले की, अहमदपूरच्या भूमीतून पर्यावरण रक्षण आणि राष्ट्रीय एकात्मतेचा संदेश घेऊन निघालेले हे अकरा सायकल वीर खऱ्या अर्थाने कौतुकास पात्र आहेत. प्रभू श्रीरामांच्या चरणी नतमस्तक होण्यासाठी निघालेली ही वारी केवळ भक्तीची नसून ती सामाजिक सलोख्याची मशाल आहे. या सर्व वीरांचा प्रवास सुखकर व्हावा, यासाठी माझ्या मनापासून शुभेच्छा!
यावेळी नगराध्यक्ष ऍड. स्वप्निल व्हत्ते, ज्येष्ठ नेते दिलीपराव देशमुख, ऍड. भारत चामे, पोलीस निरीक्षक विनोद मेत्रेवार, रोटरीचे अध्यक्ष कपिल बिरादार यांच्यासह नूतन नगरसेवक, पत्रकार आणि नागरिक मोठ्या संख्येने उपस्थित होते.
दररोज १५० कि.मी.चा प्रवास; त्रिसूत्री संदेशाचा प्रसार
अहमदपूर ते अयोध्या हे अंतर पार करण्यासाठी हे सायकल वीर दररोज सरासरी १५० किलोमीटर प्रवास करणार आहेत. ही केवळ एक धार्मिक यात्रा नसून, त्यातून खालील त्रिसूत्री संदेश दिला जाणार आहे:
पर्यावरण संरक्षण व संवर्धन: इंधनाचा वापर टाळून सायकलिंगचा प्रचार.
जागतिक शांतता व राष्ट्रीय एकात्मता: सर्वधर्मीय सलोखा आणि संविधानातील बंधुता जोपासणे.
आरोग्य जागरूकता: निरोगी जीवनशैलीसाठी सायकलिंगचे महत्त्व पटवून देणे.
धार्मिक सलोख्याचा आदर्श: लुल्लाभाई शेख यांचा सहभाग
या मोहिमेचे विशेष आकर्षण म्हणजे जि. प. शिक्षक लुल्ला शेख यांचा सहभाग. जिथे समाज धर्माच्या भिंती उभ्या करत आहे, तिथे शेख यांनी या अयोध्यावारीमध्ये हिरहिरीने सहभागी होऊन 'माणुसकी' हाच श्रेष्ठ धर्म असल्याचे सिद्ध केले आहे. सायकलच्या चाकांतून सलोख्याचा संदेश देत 'हृदय ते हृदय' जोडणारा सेतू म्हणून त्यांच्या या सहभागाचे सर्वत्र कौतुक होत आहे.
अयोध्यावारीला निघालेले 'सायकल वीर':
या मोहिमेत समाजातील विविध स्तरांतील नागरिक सहभागी झाले आहेत:
नवनाथ हंडे (ज्वेलर्स), धनंजय तोकले (शिक्षक), भरत ईगे (ज्वेलर्स), सूर्यकांत साकोळे (शिक्षक), कल्पक भोसले (सॉफ्टवेअर इंजिनिअर), अजबसिंग यदुवंशी, लुल्ला शेख (शिक्षक), तुकाराम उगीले (शिक्षक), कृष्णा काळे (ज्वेलर्स), नामदेव बरुरे (व्यापारी/शिक्षक) आणि सतीश गुरमे (पोलीस).
सध्या अहमदपूर शहरातून या सर्व सायकलवीरांवर शुभेच्छांचा वर्षाव होत असून, त्यांच्या या साहसी आणि प्रेरणादायी प्रवासाचे सर्वत्र कौतुक होत आहे.
---------------
हिंदुस्थान समाचार / Mahesh Madanrao Chitnis
