इस्लामाबाद , 26 डिसेंबर (हिं.स.)।पाकिस्तानचे माजी पंतप्रधान इमरान खान आणि त्यांची पत्नी बेगम बुशरा बीबी दीर्घकाळापासून कारागृहात आहेत. इमरान खान यांच्या पत्नी बुशरा बीबी यांना ज्या परिस्थितीत कोठडीत ठेवण्यात आले आहे, त्यामुळे त्यांच्या शारीरिक आणि मानसिक आरोग्यास गंभीर धोका निर्माण होऊ शकतो. संयुक्त राष्ट्रांनी बुशरा बीबी यांच्या आरोग्याबाबत तीव्र चिंता व्यक्त करत, परिस्थिती हाताळण्यासाठी तातडीने पावले उचलण्याचे आवाहन संबंधित अधिकाऱ्यांना केले आहे.

संयुक्त राष्ट्रांच्या मानवाधिकार उच्चायुक्त कार्यालयाने जारी केलेल्या एका प्रसिद्धीपत्रकात पाकिस्तान सरकारला कठोर शब्दांत इशारा देत, ताब्यातील परिस्थिती सुधारण्याचे निर्देश दिले आहेत. प्रसिद्धीपत्रकात नमूद करण्यात आले आहे की, बुशरा बीबी खान यांच्या आरोग्याचे संरक्षण करणे आणि मानवी प्रतिष्ठेला साजेशा अटकेत ठेवण्याच्या परिस्थिती सुनिश्चित करणे, ही राज्याची जबाबदारी आहे.

मानवाधिकार उच्चायुक्त कार्यालयाने जारी केलेल्या माहितीनुसार, बुशरा बीबी खान सध्या आदियाला कारागृहात एका लहान, हवेशीर नसलेल्या कोठडीत ठेवण्यात आल्या आहेत. ही कोठडी कथितरित्या अस्वच्छ, अत्यंत उष्ण आणि कीटक व उंदरांनी भरलेली आहे. वारंवार होणाऱ्या वीजपुरवठा खंडितीमुळे कोठडीत अंधार पसरतो. त्यांना दूषित पिण्याचे पाणी दिले जात असून, अतिप्रमाणात मिरचीपूड असलेले अन्न दिले जात असल्याने ते खाण्यायोग्य नसल्याचा आरोप आहे.

या परिस्थितीमुळे त्यांचे सुमारे 15 किलोग्रॅम वजन कमी झाल्याचे सांगितले जाते. तसेच, बुशरा बीबी खान यांना वारंवार संसर्ग होणे, बेशुद्ध पडण्याचे झटके येणे, दातातील फोड आणि पोटातील अल्सरसारख्या वैद्यकीय समस्या असूनही त्यावर योग्य उपचार होत नसल्याचे आरोप करण्यात आले आहेत.

या प्रकारच्या अटकेतील परिस्थिती किमान आंतरराष्ट्रीय मानकांपेक्षाही खूप खालच्या दर्जाच्या असल्याचे संयुक्त राष्ट्रांचे म्हणणे आहे. कोणत्याही कैद्याला अत्यधिक उष्णता, दूषित अन्न किंवा पाणी, किंवा आधीपासून असलेल्या आरोग्य समस्यांना अधिक गंभीर करणाऱ्या परिस्थितींचा सामना करायला लागू नये.

संयुक्त राष्ट्रांच्या छळविरोधी विशेष प्रतिवेदक एलिस जिल एडवर्ड्स यांनी सांगितले, “अशा परिस्थिती किमान आंतरराष्ट्रीय मानकांपेक्षाही खूप चखालच्या आहेत. कोणत्याही बंदीला अत्यधिक उष्णता, दूषित अन्न किंवा पाणी, किंवा आधीपासून असलेल्या आरोग्य समस्यांना वाढवणाऱ्या परिस्थितींच्या संपर्कात ठेवू नये.”

संयुक्त राष्ट्रांच्या प्रसिद्धीपत्रकात असेही नमूद करण्यात आले आहे की अहवालांनुसार बुशरा बीबी खान यांना अनेकदा दिवसातील 22 तासांहून अधिक काळ जवळजवळ पूर्ण एकांतवासात ठेवले जाते. काही वेळा हा कालावधी दहा दिवसांपेक्षा अधिक असतो. या काळात त्यांना व्यायामाची संधी, वाचन साहित्य, कायदेशीर सल्ला, कुटुंबीयांची भेट किंवा त्यांच्या वैयक्तिक डॉक्टरांपर्यंत पोहोच दिली जात नाही. अधिकाऱ्यांनी हे सुनिश्चित करावे की बुशरा बीबी यांना त्यांच्या वकिलांशी संवाद साधता येईल, कुटुंबीयांची भेट घेता येईल आणि अटकेत असताना त्यांना अर्थपूर्ण मानवी संपर्क मिळेल.

---------------

हिंदुस्थान समाचार / Priyanka Bansode