इस्लामाबाद, 28 डिसेंबर (हिं.स.)। पाकिस्तान सरकारने माजी पंतप्रधान इमरान खान यांचे समर्थक आणि लष्करप्रमुख असीम मुनीर यांचे कट्टर विरोधक असलेले माजी लष्करी अधिकारी आदिल राजा यांना देशविरोधी कथानक (नॅरेटिव्ह) पसरवल्याच्या आरोपाखाली दहशतवादी घोषित केले आहे. पाकिस्तानच्या गृह मंत्रालयाने या आठवड्यात सांगितले की, आदिल राजा यांना दहशतवादविरोधी कायदा अंतर्गत प्रतिबंधित व्यक्ती म्हणून घोषित करण्यात आले आहे.

वृत्तांनुसार, पाकिस्तानच्या अधिकाऱ्यांचा आरोप आहे की आदिल राजा परदेशात बसून पाकिस्तानविरोधी प्रचार मोहीम चालवत होते. याच पार्श्वभूमीवर, पाकिस्तानचे गृहमंत्री मोहसिन नकवी यांनी या महिन्यात इस्लामाबादमध्ये ब्रिटनच्या उच्चायुक्त जेन मॅरियट यांची भेट घेऊन आदिल राजा यांच्या प्रत्यार्पणासंदर्भातील कागदपत्रे औपचारिकरित्या सुपूर्द केली. मात्र, या प्रकरणावर ब्रिटन सरकारकडून अद्याप कोणतीही अधिकृत प्रतिक्रिया देण्यात आलेली नाही.

शनिवारी पाकिस्तानच्या गृह मंत्रालयाने जारी केलेल्या निवेदनात म्हटले आहे की, आदिल राजा अशा कृतींमध्ये सहभागी होते, ज्या पाकिस्तानच्या सुरक्षा, अखंडता आणि सार्वजनिक सुव्यवस्थेस गंभीर धोका निर्माण करतात.

निवेदनात पुढे म्हटले आहे,“आदिल राजा यांनी ऑनलाइन प्लॅटफॉर्म्सचा सातत्याने गैरवापर करत प्रतिबंधित दहशतवादी संघटनांशी संबंधित राष्ट्रविरोधी कथानक आणि प्रचाराला प्रोत्साहन दिले, त्यास सहाय्य केले आणि त्याचा विस्तार केला. यामुळे पाकिस्तानच्या सार्वभौमत्व आणि सुरक्षेविरोधात कारवाया घडून आल्या. त्यामुळे दहशतवादविरोधी कायदा, 1997 च्या कलम 11EE अंतर्गत दिलेल्या अधिकारांचा वापर करून पाकिस्तान सरकार आदेश देते की, आदिल राजा यांचे नाव कायद्याच्या चौथ्या अनुसूचीत प्रतिबंधित व्यक्ती म्हणून समाविष्ट करण्यात यावे.”

आदिल राजा हे पाकिस्तानचे माजी सैन्याधिकारी असून सध्या ते ब्रिटनमध्ये वास्तव्यास असलेले ब्लॉगर आहेत. ते यूट्यूबच्या माध्यमातून पाकिस्तानच्या राजकारणावर सातत्याने भाष्य करत असतात. राजा हे पाकिस्तानी सरकार आणि लष्कराचे तीव्र टीकाकार म्हणून ओळखले जातात. त्यांच्यावर माजी पंतप्रधान इमरान खान यांच्या बाबतीत पक्षपाती भूमिका घेतल्याचाही आरोप आहे.

---------------

हिंदुस्थान समाचार / Priyanka Bansode