काबुल , 3 डिसेंबर (हिं.स.)।अफगाणिस्तानमधून एक हृदय पिळवटून टाकणारा व्हिडिओ समोर आला आहे. यात 80 हजार लोकांच्या समोर एका तरुणाला गोळी मारून फाशीची शिक्षा देण्यात आली. धक्कादायक गोष्ट म्हणजे ही शिक्षा 13 वर्षांच्या एका मुलाने दिली.

शिक्षा मिळालेल्या तरुणावर त्या मुलाच्या कुटुंबातील लोकांची हत्या केल्याचा आरोप होता. तालिबानी अधिकाऱ्यांनी आरोपीची ओळख पटवली आणि अफगाणिस्तानच्या सर्वोच्च न्यायालयाने त्याला दोषी ठरवले. त्यानंतर तालिबानच्या सर्वोच्च नेते हिबतुल्लाह अखुंदजादा यांनी त्याच्या फाशीला मंजुरी दिली. यानंतर, 13 वर्षीय मुलाला विचारण्यात आले की तो दोषी ठरवलेल्या व्यक्तीला माफ करायला इच्छुक आहे का, पण मुलाने स्पष्ट नकार दिला. त्यानंतर अधिकाऱ्यांनी नागरिकांना ही सार्वजनिक फाशी पाहण्यासाठी प्रोत्साहित केले. यासाठी स्वतंत्र नोटिस जारी करण्यात आला आणि त्याचा मोठ्या प्रमाणात प्रसार करण्यात आला.

फाशी पाहण्यासाठी स्टेडियममध्ये सुमारे 80 हजार लोकांची गर्दी जमली होती. त्यानंतर तालिबानी अधिकाऱ्यांनी 13 वर्षांच्या मुलाच्या हातात बंदूक दिली आणि त्याला आरोपीला ठार मारण्याचे आदेश दिले. काही क्षणांतच त्या मुलाने स्टेडियममध्ये गोळ्या झाडून आरोपीला ठार केले.

मीडिया अहवालानुसार, तालिबानच्या सर्वोच्च न्यायालयाने फाशी दिलेल्या व्यक्तीची ओळख तलाह खानचा मुलगा मंगल अशी केली आहे. मंगलला अब्दुल रहमानची हत्या केल्याचा दोषी ठरवण्यात आले होते.ही संपूर्ण घटना दाखवणारा भयावह व्हिडिओ सोशल मीडियावर झपाट्याने व्हायरल होत आहे. व्हिडिओमध्ये दिसते की हजारोंनी भरलेल्या स्टेडियममध्ये गोळ्या झाडून सार्वजनिक फाशी दिली जाते आणि गोळीबाराच्या आवाजात धार्मिक घोषणा ऐकू येतात.

---------------

हिंदुस्थान समाचार / Priyanka Bansode