नवी दिल्ली , 30 डिसेंबर (हिं.स.)।बांगलादेशच्या माजी पंतप्रधान आणि बांगलादेश नॅशनलिस्ट पार्टी (बीएनपी) यांच्या अध्यक्षा बेगम खालिदा झिया यांच्या निधनाबद्दल पंतप्रधान नरेंद्र मोदी यांनी तीव्र शोक व्यक्त केला आहे. खालिदा झिया यांच्या योगदानाची आठवण करून देताना पंतप्रधान मोदी म्हणाले की, बांगलादेशच्या पहिल्या महिला पंतप्रधान म्हणून त्यांनी देशाच्या विकासासोबतच भारत–बांगलादेश संबंध मजबूत करण्यात महत्त्वाची भूमिका बजावली.

सोशल मीडिया प्लॅटफॉर्म ‘एक्स’वर केलेल्या पोस्टमध्ये पंतप्रधान मोदी यांनी लिहिले, “ढाक्यातील माजी पंतप्रधान आणि बीएनपी अध्यक्षा बेगम खालिदा झिया यांच्या निधनाची बातमी ऐकून अत्यंत दुःख झाले. त्यांच्या कुटुंबीयांप्रती आणि बांगलादेशातील सर्व नागरिकांप्रती आमच्या मनापासून संवेदना. ईश्वर त्यांच्या कुटुंबाला हे दुःख सहन करण्याची शक्ती देवो.”

पुढे ते म्हणाले, “बांगलादेशच्या पहिल्या महिला पंतप्रधान म्हणून, बांगलादेशच्या विकासात तसेच भारत–बांगलादेश संबंध दृढ करण्यात त्यांनी दिलेले महत्त्वपूर्ण योगदान नेहमीच स्मरणात राहील. 2015 मध्ये ढाक्यात त्यांच्याशी झालेली माझी आपुलकीची भेट मला आजही आठवते. त्यांची विचारसरणी आणि वारसा आमच्या भागीदारीला पुढेही दिशा देत राहील, अशी आम्हाला आशा आहे. त्यांच्या आत्म्यास शांती लाभो.”

दरम्यान, बांगलादेश नॅशनलिस्ट पार्टी (बीएनपी) कडून जारी करण्यात आलेल्या निवेदनानुसार, आज सकाळी सुमारे 6 वाजता ढाक्यातील एव्हरकेअर रुग्णालयात खालिदा झिया यांचे निधन झाले. गेल्या महिन्याभराहून अधिक काळ त्यांच्यावर याच रुग्णालयात उपचार सुरू होते. पक्षाचे नेते आणि समर्थकांनी त्यांच्या निधनावर तीव्र दुःख व्यक्त करत त्यांना एक महान राजकीय व्यक्तिमत्त्व म्हणून स्मरणात ठेवले, ज्यांनी बांगलादेशच्या आधुनिक राजकीय इतिहासात महत्त्वाची भूमिका बजावली होती. पक्षाने म्हटले आहे, “आम्ही त्यांच्या आत्म्याच्या शांतीसाठी प्रार्थना करतो आणि सर्वांना त्यांच्या आत्म्याच्या शांतीसाठी प्रार्थना करण्याचे आवाहन करतो.”

---------------

हिंदुस्थान समाचार / Priyanka Bansode