ओटावा , 5 फेब्रुवारी (हिं.स.)।प्रसिद्ध पंजाबी गायक प्रेम ढिल्लन यांच्या कॅनडामधील निवासस्थानी सोमवारी (३ फेब्रुवारी )गोळीबार झाल्याची माहिती समोर आली आहे. मात्र, गोळीबारात कोणतेही नुकसान झाले नाही. जयपाल भुल्लर टोळीने या गोळीबाराची जबाबदारी स्वीकारली आहे आणि ढिल्लन यांनी त्यांच्या इशाऱ्यांकडे दुर्लक्ष केल्यास भयानक परिणाम भोगावे लागतील अशी धमकी दिली आहे.
मिळालेल्या माहितीनुसार, या गोळीबारामागे जयपाल भुल्लर टोळीतील सहकारी जेंता खराद याचा हात असल्याचं म्हटलं जातं आहे.घरावर गोळीबार केल्यानंतर आरोपींनी सोशल मीडियावर पंजाबी भाषेत पोस्ट शेअर करत या हल्ल्याची जबाबदारी घेतली आहे. या पोस्टमध्ये आरोपीने दिवंगत गायक सिद्धू मूसेवालाचेही नावही घेतले आहे. ज्याची २०२२ मध्ये पंजाबमधील मानसा जिल्ह्यात गोळ्या घालून हत्या करण्यात आली होती. प्रेम ढिल्लन जर सुधारला नाही तर गंभीर परिणामांना सामोरे जावे लागेल, असा इशाराही दिला आहे.
या घटनेनंतर कॅनडाच्या सुरक्षा यंत्रणांनी या प्रकरणाची चौकशी सुरू केली आहे.गोळीबारीची जबाबदारी घेणारा जेंटा खरड हा जयपाल भुल्लर टोळीशी जोडला गेला आहे. इतकंच नाही तर तो खालिस्तानी दहशतवादी अर्श डाला याच्या संपर्कात असल्याचंही म्हटलं जात आहे. खराद सध्या ऑस्ट्रेलियामध्ये लपून बसला आहे.या घटनेमुळे पुन्हा एकदा म्युझिक इंडस्ट्री हादरली आहे.
प्रेम ढिल्लन यांचे पूर्ण नाव प्रेमजीत सिंग ढिल्लन असे आहे. २०१९ मध्ये सिद्धू मूसेवालाच्या 'बूट कट' या गाण्याने त्याला प्रसिद्धी मिळवून दिली होती. याआधीही कॅनडामध्ये पंजाबी गायक एपी ढिल्लन यांच्या घरावर गोळीबाराची घटना घडली होती, ज्याची जबाबदारी लॉरेन्स बिश्नोई टोळीने घेतली होती.पंजाबी संगीत उद्योगात वाढत्या गुन्हेगारींमुळे कलाकारांच्या सुरक्षिततेबाबत चिंता व्यक्त केली जात आहे. सुरक्षा संस्था या घटनांचा गांभीर्याने तपास करत आहेत.
---------------
हिंदुस्थान समाचार / Priyanka Bansode
