वॉशिंग्टन, 19 एप्रिल (हिं.स.)।अमेरिकन सरकारने अलीकडे अनेक परदेशी विद्यार्थ्यांना त्याचे व्हिसा रद्द झाल्याची माहिती ई-मेल द्वारे दिली आहे. यापैकी 50 टक्के विद्यार्थी भारतीय आहेत.या कारवाईमुळे भारतीय विद्यार्थ्यांमध्ये चिंतेचे वातावरण निर्माण झाले आहे.

या मेलमध्ये या विद्यार्थ्यांना अमेरिका सोडण्यास सांगण्यात आले होते.अमेरिकन इमिग्रेशन लॉयर्स असोसिएशन (AILA) ने अशा 327 विद्यार्थ्यांची माहिती गोळा केली आहे. यापैकी 50 टक्क्यांपेक्षा जास्त विद्यार्थी भारतीय आहेत.भारतीय विद्यार्थ्यांनंतर चीनमधील १४ टक्के विद्यार्थी दुसऱ्या क्रमांकावर आहेत. याशिवाय दक्षिण कोरिया, नेपाळ आणि बांगलादेश या देशांतील विद्यार्थ्यांचीही नावे या यादीत आहेत. यामुळे या विद्यार्थ्यांच्या भवितव्याबद्दल चिंता व्यक्त होत आहे.

अमेरिकेचे परराष्ट्र विभाग गेल्या चार महिन्यांपासून परदेशी विद्यार्थ्यांच्या डेटाची तपासणी करत आहे. याद्वारे इस्रायलविरुद्ध आणि हमासच्या समर्थनार्थ निदर्शने करणाऱ्या परदेशी विद्यार्थ्यांचे व्हिसा रद्द केले जात आहेत. परराष्ट्र सचिव मार्को रुबियो यांच्या मते, 26 मार्चपर्यंत, 300 हून अधिक 'हमास-समर्थक' विद्यार्थ्यांचे F-1 व्हिसा रद्द करण्यात आले होते. यामध्ये अनेक भारतीय विद्यार्थ्यांचाही समावेश आहे.

अमेरिकन सरकारने २० जानेवारी २०२५ पासून ४७०० हून अधिक परदेशी विद्यार्थ्यांचे व्हिसा व शिक्षण रेकॉर्ड रद्द केले आहेत. मात्र, यासाठी केवळ एआयची मदत घेण्यात आली आहे.अनेक प्रकरणांमध्ये कोणतीही गुन्हेगारी पार्श्वभूमी नसतानाही विद्यार्थ्यांना अडकविण्यात येत आहे. अमेरिकेत शिक्षण घेत असलेल्या अनेक विद्यार्थ्यांना ट्रम्प प्रशासनाने मेसेज पाठवले आहेत. याबाबत भारत सरकार सतर्क असून विद्यार्थ्यांना मदत केली जात आहे.

अमेरिकी कायद्याचे उल्लंघन करणाऱ्या विद्यार्थ्यांना त्याचे परिणाम तर भोगावेच लागतील, यात हद्दपारीच्या कारवाईचाही समावेश आहे, असा इशारा अमेरिकी परराष्ट्र मंत्रालयाच्या प्रवक्त्या मार्गारेट मॅकलियोड यांनी दिला आहे. तुम्ही कायद्याचे पालन करीत असाल, तर तुम्हाला संधी उपलब्ध करून दिल्या जातील. मात्र, कायद्याचे उल्लंघन करणाऱ्यांना परिणाम भोगावे लागतील, असे त्यांनी म्हटले. यामुळे भारतीय विद्यार्थ्यांसमोर हद्दपारीचे संकट आहे.

---------------

हिंदुस्थान समाचार / Priyanka Bansode