रत्नागिरी, 2 एप्रिल, (हिं. स.) : जगन्नाथपुरी (ओडिसा) येथील ५७व्या पुरुष व महिला राष्ट्रीय अजिंक्यपद खो-खो स्पर्धेसाठी महाराष्ट्र संघाकडून निवड झालेल्या महिला संघात रत्नागिरीच्या पायल पवारचा समावेश आहे.

अहिल्यानगर येथे झालेल्या राज्यस्तरीय निवडचाचणी खो-खो स्पर्धेतून पुरुष व महिला गटाचे संघ निवडण्यात आले होते. सांगली येथे सराव शिबिर झाल्यानंतर हे दोन्ही संघ नुकतेच जगन्नाथपुरीकडे रवाना झाले आहेत. या संघांना महाराष्ट्र खो-खो असोसिएशनचे अध्यक्ष संजीवराजे नाईक-निंबाळकर, खो-खो फेडरेशन ऑफ इंडियाचे सहसचिव तथा राज्य खो-खो असोसिएशनचे सचिव डॉ. चंद्रजित जाधव, कार्याध्यक्ष सचिन गोडबोले, खजिनदार ॲड. गोविंद शर्मा यांच्यासह राज्य असोसिएशनचे सर्व पदाधिकारी यांनी संघाला शुभेच्छा दिल्या आहेत.

दोन्ही राष्ट्रीय स्पर्धेत सुवर्णमय कामगिरी करतील, अशी आशा सचिव डॉ. जाधव यांनी व्यक्त केली आहे. पवार हिने आतापर्यंत विविध राष्ट्रीय स्पर्धांमध्ये महाराष्ट्र संघात रत्नागिरीचे प्रतिनिधित्व केले आहे. तिला राष्ट्रीय मार्गदर्शक पंकज चवंडे यांचे मार्गदर्शन मिळत असून, तिच्या निवडीबद्दल महाराष्ट्राचे माजी सचिव संदीप तावडे, विनोद मयेकर यांच्यासह रत्नागिरी जिल्हा खो-खो असोसिएशनतर्फे अभिनंदन करण्यात आले.

---------------

हिंदुस्थान समाचार / रत्नागिरी