रत्नागिरी, 26 एप्रिल, (हिं. स.) : स्त्नागिरीतील एका पोलीस कॉन्स्टेबलने लग्नाचे आमिष दाखवून लग्नास नकार देत पुणे येथील महिला पोलिसाची फसवणूक केली.
अमोल मांजरे असे या पोलीस कॉन्स्टेबलचे नाव आहे. पोलीस भरतीसाठी तो ट्रेनिंग घेत असलेल्या एका अॅकॅडमीत त्याची एका महिला स्पर्धकाशी ओळख झाली होती. त्यानंतर २०१८ साली या दोघांचीही पोलीस भरतीत नियुक्ती झाली. अमोल रत्नागिरीत तर ती महिला पुणे येथे पोलीस कर्मचारी म्हणून कार्यरत होती. ओळखीचे रूपांतर प्रेमात झाल्यानंतर दोघांच्या भेटीगाठी वाढू लागल्या.
त्यानंतर अमोलने त्या महिला पोलीस कर्मचाऱ्याला लग्नाचे आमिष दाखवले. तिने अमोलकडे लग्नाचा तगादा लावला, त्यावेळी त्याने माझ्या आईवडिलांनी माझ्यासाठी मुलगी पाहिलेली असल्यामुळे मी तुझ्याशी लग्न करू शकणार नाही असे सांगितले.
आपली फसवणूक झाल्याचे लक्षात येताच तिने याबाबत वाघोली पोलीस ठाण्यात गुन्हा दाखल केला. या प्रकरणी त्या कॉन्स्टेबलला निलंबित करण्यात आले आहे.
---------------
हिंदुस्थान समाचार / रत्नागिरी
