वॉशिंग्टन, 30 जुलै (हिं.स.) : अमेरिकेचे राष्ट्राध्यक्ष डोनाल्ड ट्रम्प यांनी मंगळवारी भारतावर २० ते २५ टक्के कर लादण्याचे संकेत दिले. ट्रम्प यांनी म्हटले की, भारतावर २० ते २५ टक्के टॅरिफ लादले जाऊ शकते.मात्र, त्यांनी असेही म्हटले की अद्याप शुल्काबाबत कोणताही अंतिम निर्णय झालेला नाही. यादरम्यान, ट्रम्प यांनी पुन्हा एकदा भारत आणि पाकिस्तानमध्ये युद्धबंदी केल्याचा दावा केला. अमेरिकेचे राष्ट्राध्यक्ष डोनाल्ड ट्रम्प पत्रकारांशी बोलताना म्हणाले कि, भारत हा एक चांगला मित्र आहे, परंतु गेल्या काही वर्षांत त्यांनी अमेरिकन वस्तूंवर आतापर्यंतचा सर्वाधिक टॅरिफ लावला आहे. यासोबतच ट्रम्प यांनी पुन्हा एकदा दावा केला की त्यांनी भारत आणि पाकिस्तानमध्ये युद्धबंदी आणली आहे. ते म्हणाले की, मी भारताला पाकिस्तानसोबतचा संघर्ष संपवण्याचे आवाहन केले होते. ट्रम्प यांचे हे विधान १ ऑगस्टच्या टॅरिफ अंमलबजावणी तारखेपूर्वी आले. तथापि, ट्रम्प यांनी इतर अनेक देशांप्रमाणे टॅरिफ लादण्याबाबत भारताला कोणतेही पत्र पाठवलेले नाही. भारतासह अनेक देश अमेरिकेसोबत व्यापार करार अंतिम करण्याचा प्रयत्न करत आहेत. पुढील महिन्यात अमेरिकेचे पथक बैठकीसाठी भारतात येत आहे. माहितीनुसार, दोन्ही देशांमधील प्रस्तावित द्विपक्षीय व्यापार करारावरील पुढील फेरीच्या चर्चेसाठी अमेरिकेची ही टीम २५ ऑगस्ट रोजी भारतात येणार आहे. दोन्ही देश सप्टेंबर-ऑक्टोबरपर्यंत व्यापार करारांचा पहिला टप्पा पूर्ण करण्यासाठी काम करत आहेत. यासोबतच, अंतरिम व्यापार कराराची शक्यता देखील शोधली जात आहे.व्यापार कराराबाबतच्या चर्चेचा शेवटचा टप्पा वॉशिंग्टनमध्ये पार पडला. तिथे भारताचे मुख्य वाटाघाटीकार राजेश अग्रवाल आणि अमेरिकेचे व्यापार प्रतिनिधी ब्रेंडन लिंच यांनी चर्चा केली. दरम्यान, डोनाल्ड ट्रम्प यांनी जगातील देशांना इशारा दिला होता की, ज्या देशांनी आमच्याशी व्यापार करार केला नाही त्यांच्याकडून आम्ही १५ ते २० टक्के कर आकारू शकतो. हे एप्रिल महिन्यात अमेरिकेने ठरवलेल्या १०% कर बेसलाइनपेक्षा खूपच जास्त आहे. तथापि, यामुळे लहान देशांवर आर्थिक दबाव येऊ शकतो.

---------------

हिंदुस्थान समाचार / Priyanka Bansode