वॉशिंग्टन, 30 जुलै (हिं.स.)। अमेरिकेचे राष्ट्राध्यक्ष डोनाल्ड ट्रम्प यांनी भारतावर २५ टक्के कर लादण्याची घोषणा केली असून हा निर्णय येत्या १ ऑगस्टपासून लागू होणार असल्याचे म्हटले आहे.

एप्रिलमध्ये जाहीर केल्यानुसार हा 26 टक्के परस्पर कर (Reciprocal Tariffs) असणार होता. मात्र आता हा दर 20-25 टक्क्यांपर्यंत असणार आहे. दुसरीकडे मात्र ट्रम्प यांनी 1 ऑगस्टच्या डेडलाईनपूर्वी दोन्ही देश व्यापार करारावर वाटाघाटी करत असल्याने अंतिम कर अद्याप निश्चित झालेला नसल्याचेही स्पष्ट केले आहे.

डोनाल्ड ट्रम्प यांनी ट्रुथ या सोशल प्लॅटफॉर्मवर लिहिले की, अमेरिका १ ऑगस्टपासून भारतातून आयात होणाऱ्या उत्पादनांवर अतिरिक्त २५ टक्के कर लादेल. रशियाकडून तेल खरेदी केल्याबद्दल भारतावर दंड लावण्याची घोषणाही ट्रम्प यांनी केली आहे. मित्र असूनही, भारत आणि अमेरिकेत फारसा व्यापार झाला नाही. लक्षात ठेवा, भारत आमचा मित्र आहे, परंतु गेल्या काही वर्षांत आम्ही त्यांच्याशी तुलनेने कमी व्यापार केला आहे. कारण ते खूप जास्त शुल्क लादतात. जगातील कोणत्याही देशापेक्षा भारतात सर्वात कठीण व्यापार अडथळे आहेत, असंही ट्रम्प यांनी या पोस्टमध्ये म्हटले आहे.

गेल्या ३ वर्षांपासून रशिया आणि युक्रेनमध्ये युद्ध सुरू आहे, यामुळे युरोपीय देशांनी रशियावर अनेक निर्बंध लादले. युरोपीय देश रशियाकडून कच्चे तेल आणि वायू आयात करत नाहीत. यामुळे, भारत गेल्या अनेक वर्षांपासून रशियाकडून स्वस्त कच्चे तेल खरेदी करत आहे, हे अमेरिका आणि युरोपच्या डोळ्यात खुपत आहे. यामुळे, अमेरिकन राष्ट्राध्यक्षांनी भारतावर २५ टक्के शुल्क आणि दंड लादला आहे.

---------------

हिंदुस्थान समाचार / सुधांशू जोशी