चंद्रपूर, 31 जुलै (हिं.स.)।

2024-25 या वर्षासाठी आक्टोबर महिन्यात विशेष गौरव पुरस्कार समितीची बैठक आयोजित करण्यात येणार असून सदर बैठकीमध्ये सैनिक कल्याण विभागामार्फत प्राप्त प्रकरणांची छाननी करून विशेष गौरव पुरस्कार देण्याचे नियोजन आहे. त्याकरीता माजी सैनिक - पत्नी वा पाल्य यांनी 15 सप्टेंबर पर्यंत अर्ज सादर करावे, असे आवाहन करण्यात आले आहे.

नागपूर मंडळाच्या इयत्ता 10 वीच्या परिक्षेत 90 टक्के व 12 वीच्या परिक्षेत 85 टक्के पेक्षा जास्त गुण मिळवून उत्तीर्ण होणाऱ्या पहिल्या दहा माजी सैनिक- विधवा यांच्या पाल्यांना तसेच पदवी किंवा पदव्युत्तर परिक्षेत विद्यापीठात प्रथम क्रमांकाने उत्तीर्ण झालेल्या माजी सैनिक - पत्नी - पाल्य यांना एकरकमी 10 हजार रुपये विशेष गौरव पुरस्कार देण्यात येईल. IIT, IIM, AIIMS अशा नामवंत व ख्यातीप्राप्त संस्थामध्ये प्रवेश मिळालेल्या माजी सैनिक विधवा यांच्या पाल्यांना 25 हजार रुपये गौरव पुरस्कार देण्यात येईल.

तसेच राष्ट्रीय-आंतरराष्ट्रीय पातळीवर खेळातील पुरस्कार प्राप्त खेळाडू, साहित्य संगीत, गायन, वादन, नृत्य इत्यादी क्षेत्रातील पुरस्कार वीजेते, यशस्वी उद्योजकांचा पुरस्कार मिळविणारे, संगणक क्षेत्रात अतिउत्कृष्ट कामगिरी करणारे, पूर/जळीत/दरोडा/अपघात अगर इतर नैसर्गिक आपत्तीमध्ये बहुमुल्य कामगिरी करणारे, तसेच देश/राज्याची प्रतिष्ठा वाढवतील, अशा स्वरुपाचे लक्षणीय काम करणारे माजी सैनिक/पत्नी/पाल्य इ. यांना अशा कार्याबद्दल त्यांचा सन्मानार्थ राष्ट्रीय स्तरासाठी 10 हजार रुपये व आंतरराष्ट्रीय स्तरासाठी 25 हजार रुपयांचा पुरस्कार, जिल्हा सैनिक कल्याण विभाग, पुणे यांच्या मार्फत प्रदान करण्यात येणार आहे.

तेव्हा चंद्रपूर जिल्ह्यातील सर्व संबंधित माजी सैनिक / विधवांनी विशेष गौरव पुरस्कार निवडीसाठी त्यांनी आपले प्रकरण जिल्हा सैनिक कल्याण कार्यालय, चंद्रपूर येथे दिनांक 15 सप्टेंबर 2025 पर्यंत सादर करावे. त्यानंतर प्राप्त अर्जाचा विचार केला जाणार नाही, याची सर्व संबंधित माजी सैनिक - विधवांनी नोंद घ्यावी, असे जिल्हा सैनिक कल्याण अधिकारी कार्यालयाने कळविले आहे.

---------------

हिंदुस्थान समाचार / एम.पंकजराव