मुंबई, ११ ऑगस्ट (हिं.स.) : भारतातील वाढत्या ग्लोबल कॅपेबिलिटी सेंटर क्षेत्रासाठी कुशल मनुष्यबळ तयार करण्याच्या उद्देशाने, कोहिनूर एज्युकेशन ट्रस्टच्या ग्लोबल कॅपेबिलिटी कॉलेजने ॲपेक्स ग्रुपसोबत एक महत्त्वपूर्ण धोरणात्मक भागीदारीची घोषणा केली आहे. या भागीदारी अंतर्गत, 'ॲसेट सर्व्हिसिंग' या विषयातील पहिला १० महिन्यांचा पूर्णवेळ स्वायत्त कार्यक्रम सुरू करण्यात आला आहे.
या कार्यक्रमात विद्यार्थ्यांना ६ महिन्यांची पगारी इंटर्नशिप मिळेल आणि यशस्वीरीत्या पूर्ण झाल्यावर त्यांना वार्षिक ५ लाख रुपयांच्या सुरुवातीच्या वेतनासह नोकरीची हमी दिली जाईल.
कोहिनूर एज्युकेशन ट्रस्टचे गव्हर्निंग बोर्डचे मानद अध्यक्ष, सीए सुनील जी. करवे म्हणाले, कोहिनूर एज्युकेशन ट्रस्टमध्ये, आम्ही भविष्यातील उद्योगांच्या मागणीनुसार शैक्षणिक अभ्यासक्रम तयार करण्यासाठी कटिबद्ध आहोत. ॲपेक्स ग्रुपसोबतची ही भागीदारी त्या दिशेने एक मोठे पाऊल आहे. हा ॲसेट सर्व्हिसिंग कार्यक्रम विद्यार्थ्यांना केवळ एक मजबूत शैक्षणिक पायाच नाही, तर आर्थिक सेवांच्या क्षेत्रात यशस्वी होण्यासाठी आवश्यक असलेले व्यावहारिक ज्ञान आणि उद्योगाचा अनुभवही देईल.
ॲपेक्स ग्रुप इंडियाचे कंट्री हेड, अक्षय ठाकूरदेसाई म्हणाले, आम्ही असा कार्यक्रम सुरू करताना अभिमान वाटतो, जो केवळ सैद्धांतिक ज्ञानावर नव्हे, तर नोकरीसाठी तयार असलेल्या प्रतिभेवर लक्ष केंद्रित करतो. हा उपक्रम उद्योगाशी संबंधित कौशल्ये देऊन आर्थिक व्यावसायिकांच्या पुढील पिढीला सशक्त बनवण्याच्या आमच्या वचनबद्धतेचे प्रतीक आहे, तसेच उद्योग आणि शिक्षण यांच्यातील संबंध अधिक मजबूत करतो.
हा कार्यक्रम भारतातील वेगाने विस्तारणाऱ्या ग्लोबल कॅपेबिलिटी सेंटर क्षेत्रातील कुशल कर्मचाऱ्यांची वाढती मागणी पूर्ण करण्यासाठी तयार करण्यात आला आहे. याचा उद्देश अशा व्यावसायिकांना प्रशिक्षण देणे आहे, जे या क्षेत्रातील मोठ्या संस्थांमध्ये लगेच योगदान देऊ शकतील.
नॅसकॉमच्या माहितीनुसार, भारतात सध्या सुमारे १,२०० GCCs कार्यरत आहेत, ज्यात अंदाजे १.६ दशलक्ष व्यावसायिक काम करतात. २०३० पर्यंत ही संख्या दुप्पट होऊन २,४०० केंद्रांपर्यंत पोहोचण्याची शक्यता आहे, ज्यामुळे ४.५ दशलक्षाहून अधिक रोजगार संधी निर्माण होऊ शकतात.
KET आणि Apex Fund Services LLP यांच्यात सामंजस्य करार (MoU) झाला. भारतातील कॉर्पोरेट क्षेत्राच्या बदलत्या गरजा, विशेषतः GCCs च्या वाढीमुळे, भविष्यवेधी शिक्षण देण्यासाठी KET च्या प्रवासातील हा एक महत्त्वाचा टप्पा आहे.
---------------
हिंदुस्थान समाचार / सुधांशू जोशी
