झाग्रेब, 14 सप्टेंबर (हिं.स.)भारतीय कुस्ती संघाला मोठा धक्का बसला आहे. पॅरिस ऑलिंपिकमध्ये कांस्यपदक जिंकणारा अमन सेहरावत जाग्रेबमधील जागतिक कुस्ती अजिंक्यपद स्पर्धेमध्ये जादा वजनामुळे अपात्र ठरला आहे.

पुरुषांच्या फ्रीस्टाइल ५७ किलो गटाच्या सामन्यापूर्वी घेण्यात आलेल्या वजन चाचणीत अमनचे वजन १.७ किलो जास्त आढळले. त्यामुळे त्याला स्पर्धेतून वगळण्यात आलेआहे. 'अमनला त्याचे वजन नियंत्रित करता आले नाही हे दुर्दैवी आणि आश्चर्यकारक आहे. जेव्हा तो वजन यंत्रावर उभा राहिला तेव्हा त्याचे वजन १७०० ग्रॅम जास्त होते. हे अजिबात मान्य नाही. इतके अतिरिक्त वजन कसे आले, हे आमच्या समजण्यापलीकडे आहे. अशी प्रतिक्रिया भारतीय संघातर्फे देण्यात आली आहे.

अमन २५ ऑगस्ट रोजी क्रोएशियातील झाग्रेबला पोहोचला होता. जिथे तो इतर भारतीय कुस्तीपटूंसोबत एका अ‍ॅक्लिमेटायझेशन कॅम्पमध्ये सामील झाला होता. या काळात त्याच्याकडे वजन कमी करण्यासाठी पुरेसा वेळ होता. प्रसिद्ध छत्रसाल स्टेडियममध्ये सराव करणाऱ्या २२ वर्षीय अमनला भारतीय संघासाठी पदकासाठी प्रबळ दावेदारांपैकी एक मानले जात होते. मात्र आता जादा वजनामुळे तो या स्पर्धेसाठी अपात्र ठरला आहे.

---------------

हिंदुस्थान समाचार / वृषाली देशपांडे