चंद्रपूर, 15 सप्टेंबर (हिं.स.)।

गोंडपिपरी-पोंभुर्णा सीमेवरील अंधारी नदीपात्रात शुक्रवारी वाघ मृतावस्थेत आढळून आला. काहींनी त्याचे चित्रीकरण करून व्हायरल केले. यानंतर तेथून वाघाचा मृतदेह वाहून गेल्याची घटना समोर आली. मात्र रविवारी उशिरापर्यंत वाघाचा मृतदेह सापडला नाही, अशी माहिती वनविभागाच्या सूत्रांनी हिंदुस्थान समाचारशी बोलताना दिली.

पोंभुर्णा येथून मृतावस्थेतील वाघ असल्याची माहिती समोर आली. अंधारी नदी ही पोंभुर्णा येथून वाहत कुलथा येथे वैनगंगेला मिळते. त्यामुळे त्या प्रवाहाने तो गोडपिंपरी वनविभाग परिसरात आला असल्याची माहिती होती. नदीतून वाहत आलेल्या वाघाचे दृश्य अनेकांनी मोबाईलमध्ये कैद केले. काही वेळातच हा व्हिडिओ सोशल मीडियावर व्हायरल झाला आणि परिसरात मोठी खळबळ उडाली. वनविभागाला माहिती मिळताच पथके घटनास्थळी रवाना झाली, मात्र पाण्याचा विसर्ग वाढल्याने मृतावस्थेतील वाघ पुढे वाहून गेला. त्यामुळे अद्याप वाघाचा मृतदेह सापडलेला नाही. तो नेमका कोणत्या क्षेत्रातील वाघ आहे, याचाही शोध सुरू आहे.

त्याच्या मृत्यूबाबत बाबत संभ्रम आहे. मृतदेह हाती आल्यानंतरच खरा खुलासा होणार आहे.

---------------

हिंदुस्थान समाचार / एम.पंकजराव