रत्नागिरी, 17 सप्टेंबर, (हिं. स.) : जिल्हा मध्यवर्ती बँकेच्या कर्ला शाखेतील ५० लाखांच्या सोन्याच्या दागिन्यांच्या अपहारप्रकरणी संशयित शाखाधिकारी किरण विठ्ठल बारये याचा अटकपूर्व जामीन अर्ज न्यायालयाने फेटाळला आहे. त्यामुळे आता पोलीस त्याचा शोध घेत आहेत. दरम्यान, कॅशिअर ओंकार कोळवणकर याच्यावर कायदेशीर कारवाई सुरू असून शिपाई अमोल मोहिते याला न्यायालयीन कोठडी सुनावण्यात आली आहे. अपहाराची घटना १८ फेब्रुवारी २०२५ ते ४ ऑगस्ट २०२५ या कालावधीत घडली. या काळात तारण ठेवलेले नागरिकांचे दागिने तिजोरीत सुरक्षित ठेवण्याऐवजी तिघांनी संगनमत करून त्यातील काही दागिने परस्पर चोरल्याचे समोर आले. प्राथमिक तपासात त्यांनी ५०४.३४ ग्रॅम सोन्याचे दागिने लांबवल्याचे उघड झाले असून त्याची किंमत सुमारे ५० लाख रुपये असल्याचा अंदाज आहे. या प्रकरणी शहर पोलीस ठाण्यात तिन्ही संशयितांविरोधात गुन्हा दाखल करण्यात आला. शिपाई मोहितेला तात्काळ अटक झाली. इतर दोन संशयित फरार झाले होते. शाखाधिकारी बारये याने अटकपूर्व जामिनासाठी न्यायालयात अर्ज केला होता. मात्र न्यायालयाने तो अर्ज फेटाळताच पोलीस त्याचा शोध घेत आहेत.

---------------

हिंदुस्थान समाचार / रत्नागिरी