पुणे, 17 सप्टेंबर (हिं.स.) पुणे विमानतळावरील सुरक्षा तपासणीत उशिर झाल्यामुळे ६ नेमबाजांचे गोवा स्पर्धेसाठीचे विमान चुकले. १८ वर्षांखालील सर्व नेमबाज मंगळवारी गोव्यात १२ व्या वेस्टर्न झोन शूटिंग चॅम्पियनशिपमध्ये सहभागी होण्यासाठी अकासा एअरच्या विमानाने उड्डाण करणार होते.

या घटनेला उत्तर देताना अकासा एअरने सांगितले की, विशेष शूटिंग उपकरणांच्या उपस्थितीत त्यांच्या सामानाशी संबंधित अतिरिक्त सुरक्षा प्रक्रियेमुळे नेमबाजांना विमानात चढता आले नाही. एअरलाइनने सांगितले की, त्यांची टीम आवश्यक मदत पुरवत आहे आणि पर्यायी प्रवास व्यवस्था केली जात आहे. हे नेमबाज ऑलिंपियन गगन नारंग यांच्या शूटिंग अकादमी गन फॉर ग्लोरीमधून होते.

अकादमीने म्हटले आहे की, आकासा एअरची सेवा अत्यंत निराशाजनक होती. १२ व्या पश्चिम विभागीय शूटिंग चॅम्पियनशिपसाठी पुणे ते गोवा प्रवास करणारे आमचे खेळाडू त्यांच्या रायफल आणि पिस्तूलसाठी आवश्यक असलेली सर्व कागदपत्रे घेऊन साडेतीन तास आधीच विमानतळावर पोहोचले. सुरळीत सुविधा देण्याऐवजी, कर्मचाऱ्यांनी प्रक्रिया उशिरा केली. काउंटरवर सहकार्य केले नाही आणि शेवटी खेळाडू, प्रशिक्षक आणि पालकांना विमानात चढू देण्यास नकार दिला.

एअरलाइनने पुढे म्हटले आहे की, आमची टीम सर्व आवश्यक मदत पुरवत आहे आणि गोव्यात स्पर्धेत पोहोचण्यासाठी त्यांच्यासाठी पर्यायी प्रवास व्यवस्था केली जात आहे. झालेल्या गैरसोयीबद्दल आम्हाला मनापासून वाईट वाटते. अकासा एअरमध्ये प्रवाशांची सुरक्षा ही आमची सर्वोच्च प्राथमिकता आहे. सुरळीत आणि विश्वासार्ह प्रवास अनुभवासाठी आवश्यक प्रोटोकॉलचे पालन केले जाईल याची खात्री करण्यासाठी आम्ही सतत प्रयत्नशील आहोत.

---------------

हिंदुस्थान समाचार / वृषाली देशपांडे