छत्रपती संभाजीनगर, 18 सप्टेंबर, (हिं.स.)। कन्नड-सोयगाव मतदारसंघात गेल्या काही दिवसांत झालेल्या अतिवृष्टीमुळे शेतकरी बांधवांवर मोठे संकट कोसळले आहे. उभ्या पिकांचे नुकसान, पशुधनाची हानी, घरांचे व अन्य मूलभूत सुविधांचे झालेले नुकसान यामुळे शेतकरी बांधव आर्थिकदृष्ट्या तसेच मानसिकदृष्ट्याही अडचणीत आला आहे.

या गंभीर परिस्थितीची माहिती देण्यासाठी महाराष्ट्र राज्याचे मुख्यमंत्री देवेंद्र फडणवीस यांची कन्नड सोयगाव विधानसभा मतदारसंघाच्या शिवसेनेच्या आमदार संजना जाधव यांनी भेट घेतली. याप्रसंगी खासदार श्री. संदिपान पाटील भुमरे हे देखील उपस्थित होते.

यावेळी शेतकऱ्यांच्या नुकसानीबाबत सविस्तर आढावा मांडत तातडीने पंचनामे करण्याचे निर्देश अधिकाऱ्यांना देऊन शेतकरी बांधवांना शासनाच्या माध्यमातून योग्य ती मदत लवकरात लवकर मिळावी यासाठी मागणी केली.

या मागणीला मुख्यमंत्री फडणवीस यांनी सकारात्मक प्रतिसाद दिला असून लवकरात लवकर पंचनामे करून मदत मिळवून देण्याचे आश्वस्त केले.

हिंदुस्थान समाचार / Hanumant Madanrao Chitnis