अकोला, 28 सप्टेंबर (हिं.स.)।

मूर्तिजापूर तालुक्यात यंदा अतिवृष्टीमुळे पिकांचे मोठ्या प्रमाणात नुकसान झाले असून, शासनाने तातडीने ओला दुष्काळ जाहीर करावा, या मागणीसाठी प्रगती शेतकरी मंडळासह तालुक्यातील सर्व शेतकऱ्यांनी एक महत्त्वाचा इशारा दिला आहे. जर शासनाने त्यांच्या मागण्या मान्य केल्या नाहीत, तर दिवाळीच्या दिवशी शेतकरी मूर्तिजापूर येथील तहसील कार्यालयासमोर 'काळी दिवाळी' साजरी करतील, असे प्रगती शेतकरी मंडळाचे अध्यक्ष राजू वानखडे यांनी जाहीर केले आहे.

मागील काही दिवसांपासून सुरू असलेल्या संततधार पावसामुळे सोयाबीन, कपाशी, उडीद आणि इतर पिकांचे मोठे नुकसान झाले आहे. अनेक ठिकाणी शेतात पाणी साचल्याने उभी पिके पूर्णपणे सडली आहेत. यामुळे शेतकरी मोठ्या आर्थिक संकटात सापडले आहेत.

शेतकऱ्यांच्या प्रमुख मागण्या

* ओला दुष्काळ जाहीर करा: तालुक्यात झालेल्या नुकसानीची पाहणी करून तातडीने ओला दुष्काळ जाहीर करावा.

* आर्थिक मदत द्या: शासनाने प्रति हेक्टर ५०,००० रुपयांची आर्थिक मदत शेतकऱ्यांना द्यावी.

* हमीभाव कायद्याची अंमलबजावणी: शेतकऱ्यांच्या शेतमालाला पूर्ण हमीभाव मिळावा, यासाठी हमीभाव कायद्याची अंमलबजावणी करावी.

* कर्जमाफी: नैसर्गिक आपत्तीमुळे कर्जबाजारी झालेल्या शेतकऱ्यांचे संपूर्ण कर्ज माफ करावे.

राजू वानखडे यांनी सांगितले की, जर शासनाने या मागण्यांकडे दुर्लक्ष केले, तर कर्जबाजारी झालेल्या शेतकऱ्यांवर दिवाळीच्या सणासुदीच्या काळातही आंदोलन करण्याची वेळ येईल. दिवाळी हा सण आनंदाचा असला तरी, यंदाच्या पिकांच्या नुकसानीमुळे शेतकऱ्यांच्या घरात कोणताही आनंद राहिलेला नाही. यामुळे सर्व शेतकरी मिळून तहसील कार्यालयासमोर काळी दिवाळी साजरी करतील.

या आंदोलनात मोठ्या संख्येने शेतकरी सहभागी होण्याची शक्यता असून, यामुळे प्रशासनावर दबाव वाढण्याची चिन्हे आहेत.

---------------

हिंदुस्थान समाचार / जयेश गावंडे