नवी दिल्ली, 18 जानेवारी (हिं.स.)।परराष्ट्रमंत्री एस. जयशंकर आणि अमेरिकेचे सिनेटर स्टीव्ह डॅन्स यांनी रविवारी नवी दिल्ली येथे भेट घेतली. या भेटीचे फोटो परराष्ट्रमंत्र्यांनी सोशल मीडिया प्लॅटफॉर्म ‘एक्स’वर शेअर केले आहेत. या भेटीमुळे भारत–अमेरिका व्यापारासंदर्भात लवकरच एखादी सकारात्मक घोषणा होण्याची शक्यता वाढली आहे. एस. जयशंकर यांनी सांगितले की अमेरिकन सिनेटरसोबत भारत आणि अमेरिका यांच्यातील द्विपक्षीय संबंध तसेच सामरिक भागीदारीवर सविस्तर चर्चा झाली.

‘एक्स’वरील पोस्टमध्ये एस. जयशंकर यांनी लिहिले, “आज सकाळी दिल्लीमध्ये सिनेटर स्टीव्ह डॅन्स यांची भेट घेऊन आनंद झाला. आमच्या परस्पर संबंधांबाबत आणि त्यांच्या सामरिक महत्त्वाबाबत खुलेपणाने चर्चा झाली.” अमेरिकन राजदूतांनी भारत हा अमेरिकेसाठी सर्वात महत्त्वाचा भागीदार असल्याचे विधान करणे आणि त्यानंतर अमेरिकन खासदाराने भारतीय परराष्ट्रमंत्र्यांची भेट घेणे, या दोन्ही घडामोडी भारत–अमेरिका व्यापारविषयक चर्चा वेगाने पुढे सरकत असल्याचे संकेत देत आहेत.

यापूर्वी परराष्ट्रमंत्र्यांनी अमेरिकेचे परराष्ट्र सचिव मार्को रुबियो यांच्याशी दूरध्वनीवर चर्चा केली होती. या चर्चेचे प्रमुख मुद्दे व्यापार, महत्त्वाची खनिजे, अणुऊर्जा आणि संरक्षण क्षेत्रातील सहकार्य हे होते. याआधी अमेरिकन राजदूत सर्जिओ गोर यांनी दोन्ही देशांतील व्यापारविषयक चर्चांबाबत सांगितले होते की दोन्ही बाजू सक्रियपणे सातत्याने संवाद साधत आहेत. प्रत्यक्षात व्यापारावरील पुढील फेरीची चर्चा मंगळवारी होणार आहे.

सर्जिओ गोर म्हणाले, “भारत हा जगातील सर्वात मोठ्या लोकसंख्येचा देश आहे, त्यामुळे चर्चांना अंतिम टप्प्यापर्यंत नेणे सोपे काम नाही. मात्र आम्ही ते साध्य करण्यासाठी ठाम आहोत. व्यापार हा आमच्या संबंधांसाठी अत्यंत महत्त्वाचा आहे. त्याचबरोबर सुरक्षा, दहशतवादविरोधी कारवाई, ऊर्जा, तंत्रज्ञान, शिक्षण आणि आरोग्य यांसारख्या इतर महत्त्वाच्या क्षेत्रांतही आम्ही एकत्र काम करत राहू.

अमेरिकन राजदूत सर्जिओ गोर यांनी भारताला अमेरिकेचा सर्वात महत्त्वाचा भागीदार असल्याचे सांगताना म्हटले होते, “भारतापेक्षा अधिक महत्त्वाचा भागीदार कोणीही नाही. येत्या काही महिने आणि वर्षांत राजदूत म्हणून माझे उद्दिष्ट एक व्यापक अजेंडा पूर्ण करण्याचे आहे. आम्ही हे काम खऱ्या अर्थाने सामरिक भागीदार म्हणून करू, ज्यामध्ये प्रत्येकजण सामर्थ्य, सन्मान आणि नेतृत्व घेऊन पुढे येईल.”

पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रम्प यांच्यातील मैत्रीबाबत ते म्हणाले, “मी ठामपणे सांगू शकतो की पंतप्रधान मोदींसोबत राष्ट्राध्यक्ष ट्रम्प यांची मैत्री खरी आहे. अमेरिका आणि भारत केवळ परस्पर फायद्यांमुळेच नव्हे, तर सर्वोच्च पातळीवर निर्माण झालेल्या दृढ संबंधांमुळे एकमेकांशी जोडले गेले आहेत. खरे मित्र वेगवेगळी मते ठेवू शकतात, पण शेवटी ते आपले मतभेद नेहमीच सोडवतात.”

---------------

हिंदुस्थान समाचार / Priyanka Bansode