रत्नागिरी, 2 जानेवारी, (हिं. स.) : उद्योगमंत्री तथा रत्नागिरी जिल्ह्याचे पालकमंत्री उदय सामंत आणि त्यांचे बंधू राजापूरचे आमदार किरण सामंत यांच्या वाढदिवसानिमित्त ओपन अंडरआर्म टर्फ क्रिकेट स्पर्धा ३ आणि ४ जानेवारी रोजी नाचणे येथील शिवरुद्र टर्फवर रंगणार आहे.

रत्नागिरीतील क्रिस्टल ग्रुपच्या वतीने क्रिस्टल चषक २०२६’ ही क्रिकेट स्पर्धा भरविण्यात आली आहे. स्पर्धेचे उद्घाटन शनिवारी (दि. ३ जानेवारी) दुपारी ३ वाजता रत्नागिरीतील दिग्गज क्रिकेटपटूंच्या उपस्थितीत पार पडणार आहे. मुंबईच्या सेंट्रल रेल्वेकडून रणजी खेळलेले आणि ७० व्या वर्षीही कोचिंग देणारे हरीश लाडे, रमाकांत आचरेकर सरांचे शिष्य व जिल्हा क्रिकेट असोसिएशनचे माजी सचिव दीपक मोरे, ‘यंग बॉईज’चे हुकमी फलंदाज सुरेश जैन, जिल्ह्याचे वेगवान गोलंदाज सईद मुकादम, अष्टपैलू खेळाडू दिवाकर मयेकर आणि महिला क्रिकेटमध्ये महाराष्ट्राचे प्रतिनिधित्व करणाऱ्या योगिता महाकाळ यांचा समावेश आहे.

TennisCricket.in यावर या स्पर्धेतील सर्व सामने लाइव्ह दाखवण्यात येणार आहेत. महाराष्ट्र क्रिकेट असोसिएशनची पंच परीक्षा दिलेले पंच असतील. रविवारी (दि. ४) सायंकाळी ७ वाजता रत्नागिरीतील महिलांच्या दोन संघात प्रदर्शनीय सामना खेळवण्यात येणार आहे. श्री साई स्पोर्टस् आणि अश्वमेध क्रिकेट अॅकॅडमी यांच्यात रंगणार आहे.

रत्नागिरीतील खेळाडूंना हक्काचे व्यासपीठ मिळावे आणि क्रिकेटचा दर्जा उंचावा या उद्देशाने क्रिस्टल ग्रुपने या स्पर्धेचे नियोजन केले आहे. शिवरुद्र टर्फ, शांतीनगर (नाचणे) येथे होणाऱ्या या सामन्यांचा आनंद घेण्यासाठी जास्तीत जास्त क्रीडाप्रेमींनी उपस्थित राहावे, असे आवाहन आयोजकांतर्फे करण्यात आले आहे.

विजेत्या संघांना अनुक्रमे २५,५५५ रुपये, १५,५५५ रुपये, मॅन ऑफ दि सीरिज २,५५५ रुपये तसेच इतर वैयक्तिक बक्षिसे दिली जाणार आहेत. सर्वोत्तम फलंदाज, गोलंदाज आणि क्षेत्ररक्षकाला प्रत्येकी १,१११ रुपये आणि सर्वांनाच चषक दिला जाईल. प्रत्येक सामन्यात ‘मॅन ऑफ दि मॅच’ चा पुरस्कार दिला जाणार आहे.

---------------

हिंदुस्थान समाचार / रत्नागिरी